Մոսկվայի կենտրոնում բացվել է «ամենամոսկվացի բանաստեղծուհի» Մարինա Ցվետաևայի արձանը
ԵՐԵՎԱՆ, 26 դեկտեմբերի./Նովոստի-Արմենիա/. Մարինա Ցվետաևայի արձանը բացվել է չորեքշաբթի՝ Մոսկվայի Բորիսոգլեբսկի նրբանցքում, բանաստեղծուհու տուն-թանգարանի դիմաց և նվիրված է նրա ծննդյան 115-ամյակին, հաղորդում է «ՌԻԱ-Նոովստին»։
Ցվետաևան ծնվել է Մոսկվայում, Տրյոխպրուդնի նրբանցքում է անցել նրա մանկությունը, իսկ Բորիսոգլեբսկիում՝ երիտասարդությունը, այստեղ նա կայացել է որպես բանաստեղծուհի, արձակագիր և դրամատուրգ։
«Թանկագին մոսկվացիներ, մայրաքաղաքի հյուրեր, շատ շնորհակալ եմ, որ հավաքվել եք այստեղ, դուք կտրվել եք ձեր գործերից և քաղաքային իրարանցումից, որպեսզի այստեղ՝ հին մոսկովյան նրբանցքում, բացենք ամենա-ամենա մոսկվացի բանաստեղծուհու արձանը»,-բացման արարողության ժամանակ ասել է Մոսկվայի փոխքաղաքապետ Լյուդմիլա Շվեցովան։
«Մոսկվացիները Ցվետաևայից սովորել և սովորում են սիրել Մոսկվան, որը նա իրենն էր համարում, և «իմ Մոսկվա» բառերը նրա բանաստեղծություններում հնչում են տարբեր մեկնաբանոթյուններով»,-նշել է Շվեցովան՝ հավելելով, որ Տրյոխպրուդնին բանաստեղծուհին անվանում էր «իմ հոգու հոգի»։
«Թող ձեր Մոսկվայում Ձեզ, Մարինա Իվանովնա, հարմար լինի»,-ասել է Շվեցովան։ Նրա խոսքերով, ոչ մի կիրթ մարդ չի կարող ապրել՝ չկարդալով Մարինա Ցվետաևայի բանաստեղծությունները մի քանի անգամ։
Շվեցովան և բանաստեղծուհու ստեղծագործության երկրպագուները ծաղիկներ են դրել արձանին։ Բացի այդ, բոլոր ցանկացողները հնարավորություն են ունեցել մոտենալ բարձրախոսին և կարդալ Ցվետաևայի բանաստեղծությունները։
Արձանն իրականացրել է ստեղծագործական խումբը, որի անդամներն են՝ քանդակագործ Նինա Մատվեևան և Ռուսասատնի վաստակավոր ճարտարապետներ Սերգեյ Բուրիցկին և Ալեքսանդր Դուբովսկին։ Հենց նրանց նախագիծն է ընտրվել մրցույթում, որն անցկացրել է ՌԴ մշակույթի նախարարությունը 1990թ.-ին։ Ցվետաևայի բրոնզաձույլ արձանը ստեղծվել է մայրաքաղաքի Մշակույթի դեպարտամենտի և հովանավորների ֆինանսավորմամբ։–0--
