Կարելիայում Ձմեռ Պապիկները ֆուտբոլ կխաղան Ձյունանուշիկների հետ
Ձմեռ Պապիկների ավանդական խաղերը կմեկնարկեն ուրբաթ՝ Կարելիայի Օլոնեց քաղաքում, «ՌԻԱ Նովոստիին» է հայտնել փառատոնի կազմկոմիտեի ներկայացուցիչ Ելենա Պիստինան։
«Մեզ մոտ կգան մոտ 15 Ձմեռ Պապիկներ՝ Մոսկվայից, Սանկտ-Պետերբուրգից, Կարելիայի քաղաքներից և Ռուսաստանի գլխավոր Ձմեռ Պապը՝ Վելիկի Ուստյուգից։ Նրանք կմասնակցեն Նոր Տարուն նվիրված բազմաթիվ շոուներին, մրցույթներին, ցուցահանդեսներին, զվարճալի սպորտային մրցումներին, որոնք կտևեն երեք օր», - ասել է Պիստինան։
Երեկոյան Ռուսաստանի գլխավոր Ձմեռ Պապը Օլոնեց քաղաքի կենտրոնական հրապարակում կվառի խորհրդանշական ամանորյա կրակը։
Նոր Տարվան նվիրված գլխավոր սպորտային իրադարձությունը կդառնա ֆուտբոլային խաղը՝ Ձմեռ Պապիկների և Ձյունանուշիկների թիմերի միջև։
Հատուկ ակցիա կնվիրվի Ձմեռ Պապիկների Օլոնեցյան խաղերի խորհրդանիշին՝ Պակայնե անունով կարելիական ազգագրական հերոսին, որը ռուսական Ձմեռ Պապիկի և եվրոպական Սանտա Կլաուսի կրտսեր եղբայրն է համարվում։ Ըստ լեգենդի, Պակայնեն ծնվել է դեկտեմբերի 1-ին։ Այդ պատճառով փառատոնին մասնակցող Ձմեռ Պապիկները մտադիր են այցելել տեղի ծննդատուն և շնորհավորել ձմեռվա առաջին ամսվա առաջին օրերին ծնված տղաներից մեկին։-0-
