ԵՐԵՎԱՆ, 10 նոյեմբերի./Նովոստի-Արմենիա/. Հայտնի վրացի գործարար Բադրի Պատարկացիշվիլին կկարողանա առաջադրվել, 2008-ի հունվարի 5-ին կայանալիք Վրաստանի նախագահական ընտրություններում, անկախ նրա դեմ հարուցված քրեական գործից, հաղորդում է «Նովոստի-Գրուզիան»։
«Վրաստանի Սահմանադրությունը և ընտրական օրենսգիրքը չեն արգելում մասնակցել ընտրություններին այն անձանց, որոնց դեմ քրեական գործ է հարուցված, քանի որ նախքան դատավճիռ կայացնելը գործում է անմեղության կանխավարկածը»,-հայտնել է Վրաստանի կենտրոնական ընտրական հանձնաժողովի իրավաբանական բաժնի ղեկավար Արչիլ Անասաշվիլին։
Նրա խոսքերով, Վրաստանի նախագահի թեկնածուների գրանցման համար օրենսդրությունը մի շարք պայմաններ է նախատեսում, որոնց նրանք պետք է համապատասխանեն։ Իսկ ինչ վերաբերում է Պատարկացիշվիլիի թեկնածության գրանցմանը, ապա այդ հարցը կդիտարկի ԿԸՀ ընտրություններին մասնակցելու վերաբերյալ համապատասխան հայտի ներկայացումից հետո։
Նոյեմբերի 10-ին տարածվել էր Բադրի Պատարկացիշվիլիի հայտարարությունը, որտեղ նա տեղեկացրել էր 2008-ի հունվարի 5-ի ընտրություններում Վրաստանի նախագահ առաջադրվելու իր ցանկության վերաբերյալ։
«Ես որոշում եմ կայացրել թույլ չտալ 2008-ի հունվարին ոչ այլընտրանքային ընտրությունների անցկացում և հայտարարում եմ դրանց իմ մասնակցության մասին։ Նախագահ ընտրվելուս դեպքում երաշխավորում եմ, որ անմիջապես հանդես կգամ նախագահական ղեկավարման ձևը խորհրդարանականով փոխարինելու հանրաքվեի նախաձեռնությամբ»,-նշվում է Պատարկացիշվիլիի հայտարարության մեջ։
Ինքը գործարարը, առկա տեղեկությունների համաձայն, ներկայումս գտնվում է Իսրայելում։ Վրաստանի գլխավոր դատախազությունը նոյեմբերի 9-ին հայտարարել էր, որ քրեական գործ է հարուցել Պատարկացիշվիլիի դեմ՝ մեղադրելով նրան ներկայիս իշխանության բռնազավթման փորձի մեջ։ Ավելի վաղ գործարարը հայտարարում էր, որ ֆինանսավորում է վրացական ընդդիմությունը։
Նոյեմբերի 7-ին Թբիլիսիում ոստիկանությունը ջրմուղ մեքենաների, արցունքաբեր գազի և ռեզինե փամփուշտների միջոցով ցրեց ընդդիմության հանրահավաքը, որը պահանջում էր նախագահի հրաժարական և արտահերթ խորհրդարանական ընտրությունների անցկացում։ Դրանից հետո Սահակաշվիլին երկրում արտակարգ դրություն մտցրեց և արտահերթ նախագահական ընտրություններ հայտարարեց 2008-ի հունվարի 5-ին։–0--
