ԵՐԵՎԱՆ, 25 սեպտեմբերի. /Նովոստի-Արմենիա/. Երկուշաբթի Ռուսաստանի նախագահ Վլադիմիր Պուտինը հայտարարել է նոր կառավարության կազմը, որի գլխավոր անակնկալը դարձավ ֆինանսների նախարար Ալեքսեյ Կուդրինի պաշտոնի բարձրացումը՝ փոխվարչապետի պաշտոնին և Գերման Գրեֆի՝ առևտրի և տնտեսական զարգացման նախարարի պաշտոնից պաշտոնաթողությունը, տեղեկացնում է «ՌԻԱ Նովոստին»։
Սեպտեմբերի կեսերին Վ. Պուտինը պաշտոնաթող արեց կառավարության ողջ կազմը՝ իր քայլը բացատրելով կառավարության աշխատանքի տեմպի նվազմամբ և 2007-2008 թթ.-ի նախընտրական շրջանում կաբինետի աշխատանքի արդյունավետության պահպանման ցանկությամբ։
Կառավարության անդամների մեծամասնությունը, այդ թվում նաև հրաժարական ներկայացրած պաշտպանության նախարար Անատոլի Սերդյուկովը, առաջին փոխվարչապետեր Սերգեյ Իվանովը և Դմիտրի Մեդվեդևը, ինչպես նաև փոխվարչապետեր Ալեքսանդր Ժուկովն ու Սերգեյ Նարիշկինը պահպանել են իրենց պաշտոնները։
Վերջին ութ տարիների ընթացքում առևտրի և տնտեսական զարգացման նախարարությունը ղեկավարող և կառուցվածքային տնտեսական բարեփոխումների անցկացման պատասխանատու Գ. Գրեֆի հետևորդը դարձավ նրա նախկին առաջին տեղակալ Էլվիրա Նաբիուլլինան։
Գ. Գրեֆը, որը ավելի վաղ բազմաթիվ անգամ հայտարարել էր պետական ծառայությունից հեռանալու իր ցանկության մասին, իրենից հետո անորոշ վիճակում է թողել Ռուսաստանի՝ Առևտրի համաշխարհային կազմակերպությանը միանալուն վերաբերող բանակցությունների ավարտի հարցը։
Ֆրադկովի կառավարությունում ամենաշատ քննադատությանը ենթարկվող անդամի՝ առողջապահության և սոցիալական զարգացման նախարար Միխայիլ Զուրաբովի տեղը կառավարությունում զբաղեցրել է ֆինանսների նախկին առաջին փոխնախարար Տատյանա Գոլիկովան։
Այսպիսով, կառավարությունում այժմ աշխատում են մտերիմ բարեկամների երկու զույգ՝ Տ. Գոլիկովայի ամուսինը արդյունաբերության և էներգետիկայի նախարար Վիկտոր Խրիստենկոն է, իսկ պաշտպանության նախարար Սերդյուկովը վարչապետ Վիկտոր Զուբկովի փեսան է։-0-
