Մոսկվայի դատախազությունը երկրորդ անգամ է հրավիրել նախկին սենատոր Չախմախչյանի փաստաբան Կուզնեցովին, որը կասկածվում է պետական գաղտնիքի հրապարակման մեջ
ԵՐԵՎԱՆ, 30 օգոստոսի./Նովոստի-Արմենիա/. Փաստաբան Բորիս Կուզնեցովը, որը պաշտպանում է Կալմիկիայի նախկին սենատոր Լևոն Չախմախչյանի շահերը և կասկածվում է պետական գաղտնիքը հրապարակելու մեջ, երկրորդ անգամ է կանչվել Մոսկվայի դատախազություն, հաղորդում է «ՌԻԱ Նովոստին»՝ հղում անելով Մոսկվայի դատախազության մամուլի ծառայությանը։
«Ներկայում քննիչը երկրորդ անգամ է ծանուցագիր ուղարկել Կուզնեցովի բնակավայրի հասցեով, որպեսզի նա 2007թ. սեպտեմբերի 12-ին ներկայանա դատախազություն»,- ասվում է «ՌԻԱ Նովոստիին» տրամադրված՝ դատախազության մամուլի հազորդագրության մեջ։
Դատախազության տվյալներով, օգոստոսի 8-ին Կուզնեցովին որպես կասկածյալ հրավիրել են քննիչի մոտ հարցաքննության, սակայն նա չի ներկայացել։ «Կուզնեցովի անունից դատախազություն եկած հեռագրում նշվում է, որ նա ապրում է Փարիզում, որտեղ էլ առաջարկում է հանդիպել քննիչի հետ կամ էլ այնտեղ ուղարկել ծանուցագիրը։ Սակայն այդ հեռագրի հեղինակի իսկությունը կասկած է հարուցում, քանի որ այն եկել է ոչ թե Փարիզից, այլ Մոսկվայի 56-րդ կապի բաժանմունքից»,- ասվում է փաստաթղթում։
Դատախազությունը հիշեցնում է, որ ըստ օրենքի, քննչական գործողությունների անցկացման, այդ թվում նաև՝ հարցաքննությունների վայրը որոշում է քննիչը։ «Առանց հարգելի պատճառների քննիչի ծանուցագրով չներկայացած անձանց նկատմամբ թույլատրելի է կիրառել օրենքով նախատեսված միջոցները»,- նշվում է մամուլի հաղորդագրության մեջ։
Մոսկվայի դատախազությունը հետաքննում է Կուզնեցովի նկատմամբ հարուցված քրեական գործը՝ ՌԴ ՔՕ 283 հոդվածի 1-ին մասով (պետական գաղտնիքի հրապարակում), որը նախատեսում է մինչև չորս տարի ազատազրկում։ Գործը հարուցվել է Տվերի դատարանի վճռի հիման վրա։ Գործը հարուցելու առիթ է հանդիսացել բողոքը, որը փաստաբանն ուղարկել ՌԴ Սահմանադրական դատարան՝ Կալմիկիայի նախկին սենատոր Լևոն Չախմախչյանի գործի հետ կապված։ Դատախազությունը գտնում է, որ բողոքին կցված փաստաթղթերը պետական գաղտնիք են պարունակում։ --0—
