Աբխազիայի բնապահպանները կարծում են, որ հանրապետության տարածքում ընկել է «տիեզերական աղբ», այլ ոչ թե վրացիների խփած ինքնաթիռը

Աբխազիայի տարածքում ընկել է ոչ թե ինքնաթիռ, այլ «տիեզերական աղբ», «ՌԻԱ Նովոստիի» հաղորդմամբ՝ նման կարծիքի է չճանաչված հանրապետության Բնապահպանական պետական ծառայության ղեկավար Ռոման Դբարը։

Վրաստանի ՆԳՆ-ն պնդում է, որ վրացական ուժերն օգոստոսի 22-ին Կոդորի կիրճի  վրա խփել են, իբր, Ռուսաստանի կողմից օդային սահմանը խախտած մի ինքնաթիռ։ Ռուսաստանն ու Աբխազիան հերքում են այդ վարկածը և անում սեփական ենթադրությունները։

«Օգոստոսի 23-ին ժամը 21։35-ին Սև ծովի վրա նկատվել է տիեզերական մարմին։ Այն ծովի վրա մտել է մթնոլորտի խիտ շերտերի մեջ, այրվել և մասերի է բաժանվել։ Մեծ բեկորները երկրին են բախվել Կովկասյան Գլխավոր Լեռնաշղթայի շրջանում, իսկ ավելի փոքրերն այրվել են մթնոլորտում»,-հայտնել է լրագրողներին Աբխազիայի գլխավոր բնապահպանը։

Նրա խոսքերով, այդ եզրահանգմանն է եկել Աբխազիայի Բնապահպանական պետական ծառայությունը՝ հիմնվելով ականատեսների վկայությունների, օբյեկտի արագության, ծավալի, անկման հետագծի վերլուծության վրա։

Վրաստանի ՆԳՆ աշխատակիցներին դեռևս չի հաջողվել Կոդորի լեռնանցքում հայտնաբերել ինքնաթիռը, որը, նրանց պնդմամբ, խփվել է այնտեղ օգոստոսի 22-ին, բայց մոտ ժամանակներս նրանք խոստանում են ներկայացնել կատարվածի ստույգ պատկերը։

Անցած շաբաթ կիրճի անտառում հրդեհ է բռնկվել։ Տեղի բնակիչների պնդմամբ, այնտեղ ինքնաթիռ է ընկել։

ՌԴ ՊՆ տեղեկատվության և հասարակայնության հետ կապերի վարչության ներկայացուցիչը հայտնել է, որ ռուսական ինքնաթիռներն այդ շրջանում թռիչքներ չեն իրականացրել։--0—