Ռուսաստանն առաջին անգամ ստացավ ձմեռային Օլիմպիադան

ԵՐԵՎԱՆ, 5 հուլիսի. /Նովոստի-Արմենիա/. Ռուսաստանը ստացավ առաջին ձմեռային Օլիմպիադան. այն կանցակցվի հանգստյան քաղաք Սոչիում 2014 թ.-ին:  Ռուսական քաղաքը հաղթանակ տարավ Գվատեմալայում տեղի ունեցած՝ Միջազգային օլիմպիական կոմիտեի նստաշրջանի քվեարկության երկրորդ փուլում՝ չորս ձայնի առավելությամբ անցնելով հարավկորեական Փխենչխանից: Երրորդ թեկնածուն՝ ավստրիական Զալցբուրգը, դուրս մնաց պայքարից առաջին փուլում, տեղեկացնում է «ՌԻԱ Նովոստին»:

Մինչօլիմպիական մրցարշավի սկզբում թեկնածուի կարգավիճակին հավակնում էր ևս չորս քաղաք՝ Ալմա-Աթան (Ղազախստան), Բորժոմին (Վրաստան), Սոֆիան (Բուլղարիա) և Խական (Իսպանիա), սակայն 2006 թ.-ի հունիսի 22-ին ՄՕԿ գործադիր կոմիտեն «կանաչ լույս» տվեց միայն ռուսական, ավստրիական և կորեական հայտերին:

Մինչև այժմ Ռուսաստանում Օլիմպիական խաղեր անցկացվել են միայն մեկ անգամ՝ 1980 թ.-ին ամառային օլիմպիադան ընդունել է Մոսկվան:

Ռուսաստանն այս անգամ Գվատեմալայում ՄՕԿ նստաշրջանին մասնակցում էր   ամենաներկայացուցչական պատվիրակությամբ:

Սոչիի օլիմպիական հայտի շնորհանդեսին մասնակցում էր նախագահ Վլադիմիր Պուտինը: Ռուսաստանի անունից նա երաշխավորեց, որ օլիմպիական օբյեկտների շինարարությունը կավարտվի ժամանակին: Պուտինը խոստացավ ապահովել Օլիմպիադայի մասնակիցների անվտանգությունը, նաև նշեց, որ փողոցներում խցանումներ չեն լինի:

Նա հավատաստիացրեց, որ Սոչիում ձյունն էլ բավարար կլինի:

Ռուսական հայտի հաղթանակի մասին Պուտինն իմացավ արդեն ինքնաթիռում, երբ Գվատեմալայից վերադառնում էր Մոսկվա: Նա հեռախոսով շնորհավորեց ռուսական պատվիրակությանը, նաև զանգահարեց ՄՕԿ նախագահ Ժակ Ռոգգեին՝ շնորհակալություն հայտնելով կոմիտեի անդամներին անաչառ որոշման համար: ՌԴ նախագահն ասաց, որ օլիմպիադայի նախապատրաստական աշխատանքները Սոչիում կանցկացվեն Միջազգային Օլիմպիական կոմիտեի հետ սերտ համագործակցությամբ:

Մամուլի ասուլիսի ժամանակ ՄՕԿ նախագահն ասաց, որ Պուտինի անձնական երաշխավորությունն ու Ռուսաստանի բնակչության մեծամասնության աջակցությունը մեծ դեր խաղացին Սոչին որպես 2014թ.-ի «սպիտակ» Օլիմպիադայի մայրաքաղաք ընտրելու գործում: «Դա մեծ վստահություն է ներշնչում, քանի որ կա ողջ երկրի և նրա ղեկավարության աջակցությունը», - ասել է Ռոգգեն՝ պատասխանելով օտարերկրյա լրագրողուհու այն հարցին, թե արդյո՞ք  «հրապուրիչ առաջնորդների մասնակցությունը հաղթանակի համար պարտադիր պայման է»:  

ՄՕԿ նախագահը նաև նշել է, որ այդպիսի աջակցությունը «ցույց է տալիս Օլիմպիական խաղերի արժեքը ոչ միայն քաղաքի ու շրջանի, այլև ողջ երկրի համար»: --0—