ԵՐԵՎԱՆ, 5 մարտի. /Նովոստի-Արմենիա/. Հայաստանում մեկնարկել է ապրիլի 2-ի խորհրդարանական ընտրությունների նախընտրական քարոզարշավի փուլը:
Հայաստանի նախագահ, ՀՀԿ ղեկավար Սերժ Սարգսյանն ելույթ է ունեցել ՀՀԿ նախընտրական քարոզարշավի մեկնարկին:
Նախագահի խոսքով, ոչ միայն իշխող կուսակցությունը, այլ նաև ողջ Հայաստանը և հայ հասարակությունը թևակոխում է պատմական կարևոր փուլ:
«Հայաստանում խորհրդարանական կառավարման համակարգ ձևավորելու գործընթացն արդեն իսկ մեր քաղաքացիների ձեռքերում է: Այսինքն՝ ձե՛ր ձեռքերում է, բարեկամնե՛ր: Եթե այսօրվանից սկսած տարբեր կուսակցությունների և դաշինքների համար դուք ընտրողներ եք, ապա ինձ համար, այո՛, բարեկամներ եք, մարտական ընկերներ և գործընկերներ: Ուրեմն տվեք ձեր ձայնը հանուն Հայաստանի անվտանգության և առաջընթացի»,- ասել է նա:
Ինչպես նշել է երկրի ղեկավարը, իր համար, որպես Հայաստանի կառավարող կուսակցության ղեկավարի, բացառիկ կարևորություն ունեն առաջիկա ընտրությունները: Բայց նա կարևորել է երկրի մեր քաղաքացիների վստահությունն արդյունքների նկատմամբ:
Նա միաժամանակ վստահեցրել է, որ այնպիսի ընտրություններ պետք է անցկացնել, որ որևէ մեկի մեջ կասկածներ չառաջանան ընտրությունների ազատության, թափանցիկության կամ էլ արդարության առնչությամբ:
Սարգսյանն ընդգծել է, որ օրենքի տառին և ոգուն համապատասխանող ընտրությունները լինելու են բոլորի հաղթանակը՝ անկախ նրանից, թե ով քանի քվե կստանա: Դա կլինի ազգի, պետության և հասարակության հաղթանակը: Նա համոզմունք է հայտնել, որ Հայաստանի քաղաքացիները պատրաստ են դրան:
«Մեր կուսակցությունը նախընտրական քարոզարշավը սկսում է պարզ կարգախոսով՝ «Անվտանգություն և առաջընթաց»»,- ասել է նախագահը, ավելացնելով, որ վերջին քսանհինգ և ավելի տարիներն իր համար եղել են ծանր աշխատանքի և պատասխանատվության տարիներ:
«Այդ ճանապարհին ես կորցրել եմ բազմաթիվ ընկերներ, ովքեր իրենց կյանքը տվել են հանուն Հայաստանի Հանրապետության անվտանգության: Եվ այսօր ասում եմ ձեզ՝ չկա ավելի կարևոր ու կենսական բան, քան երկրի ու ժողովրդի անվտանգությունն է: Մնացած ամեն ինչ վերականգնելի է: Կիսատ գործերը կարելի է ավարտին հասցնել, բացթողումները կարելի է լրացնել, սխալները կարելի է ուղղել, բայց անվտանգության հարցում չկան մանրուքներ, և յուրաքանչյուր ձախողում կարող է լինել ճակատագրական: Մենք ապահովելու ենք Հայաստանի և Արցախի հուսալի անվտանգությունը: Այսօր մեր սահմաններին կանգնած է Հայաստանի, հայ ժողովրդի ծաղիկը՝ մեր երիտասարդության սերուցքը: Նա ապրելու է ազատ ու ժողովրդավարական Հայաստանում: Նա ապրելու է մի երկրում, որն ունենալու է մեծ առաջընթաց»,- ավելացրել է ՀՀԿ նախագահը:
Նրա խոսքով, վարչապետ Կարեն Կարապետյանի կառավարության խնդիրն է՝ ապահովել ու խթանել այդ առաջընթացը, հավատացնելով, որ Հայաստանի յուրաքանչյուր քաղաքացի տեսնելու է առաջընթացի դրական ազդեցությունը ամեն տարի, ամեն տարի զգալու է իր կյանքի որակի բարելավումը:
Եվ վերջում նախագահն ավելացրել է.
Բարեկամնե՛ր,
«Հիշե՛ք, որ ոչ մի անհատ միայնակ չի կարող շատ բան անել: Մեր առջև կանգնած խնդիրների լուծումները մենք գիտենք: Բայց լուծումները պահանջում են համազգային ջանքեր, կենտրոնացում և խելամիտ ու արդյունավետ կառավարում: Եվ այդ լուծումները պահանջում են գործընթացները ճիշտ ուղղորդող ուժ: Այսօր այդ ուժը բարեփոխվող Հայաստանի Հանրապետական կուսակցությունն է՝ իր կուռ կառույցներով, իր երիտասարդացող շարքերով, իր կառավարման փորձով և, վերջապես, առաջընթացը մարմնավորող իր վարչապետով:
Մեր ընդդիմախոսների և մրցակիցների հանդեպ ունեցած ողջ հարգանքով հանդերձ՝ մենք՝ հանրապետականներս, հավատում ենք, որ մենք կհաղթենք՝ կհաղթենք, որովհետև հավատում ենք մեր երկրի ապագային, որովհետև հավատում ենք մեր ժողովրդի մեծ ներուժին: Վստահ եղեք, որ մենք դառնալու ենք տարածաշրջանի ամենաարդյունավետ և ամենաարագ զարգացող պետությունը, դառնալու ենք տարածաշրջանի ամենաապահով երկիրը: Եվ մենք սկսում ենք մեր ընտրարշավը, որպեսզի ձեզ հետ միասին մեր երկրի ու ժողովրդի համար ապահովենք ԱՆՎՏԱՆԳՈՒԹՅՈՒՆ և ԱՌԱՋԸՆԹԱՑ:
Շնորհակալություն»: -0-
