Սերժ Սարգսյանը ներկա է գտնվել «Ալեքսանդր» լյուքս կարգի հյուրանոցային համալիրի բացման արարողությանը (ՖՈՏՈ)

ԵՐԵՎԱՆ, 31 մարտի. /Նովոստի-Արմենիա/. Հայաստանի նախագահ Սերժ Սարգսյանը շաբաթ օրը մայրաքաղաքի կենտրոն համայնքում ներկա է գտնվել  «Ալեքսանդր» հյուրանոցային համալիրի բացման արարողությանը, հայտնում է նախագահի մամուլի ծառայությունը:






Հանրապետության նախագահը շրջել է նորաբաց և Հայաստանում իր դասի մեջ միակը հանդիսացող հյուրանոցային համալիրում, ծանոթացել կատարված աշխատանքներին, իրականացված ներդրումներին, ստեղծված աշխատատեղերին և առաջարկվող ծառայությունների որակին:



Լինելով «Մարիոթ ինթերնեյշնլ» ընկերությանը պատկանող «Դը լաքշրի քոլեքշն» աշխարհահռչակ ցանցի անդամ՝ «Ալեքսանդր» հյուրանոցը կառուցվել է համաշխարհային չափանիշներին համապատասխան՝ բարձրորակ շինարարական նյութերով և կահավորմամբ:



Հյուրանոցային համալիրի կառուցման նպատակով կատարված ընդհանուր ներդրումները կազմել են շուրջ 53,9 մլն ԱՄՆ դոլարին համարժեք դրամ: Հյուրանոցում, որը կարող է միաժամանակ ընդունել մինչև 230 այցելու, ստեղծվել է 280 հազ. ՀՀ դրամ միջին աշխատավարձով 144 աշխատատեղ:

Պատասխանատուների խոսքով, այն առաջիկայում նախատեսվում է հասցնել 170-ի: