ԵՐԵՎԱՆ, 14 մարտի./Նովոստի-Արմենիա/. «Սասնա Ծռեր» համահայկական կուսակցությունը կոչ է անում ՀՀ իշխանություններին արտակարգ դրություն հայտարարել Հայաստանում կորոնավիրուսի տարածման ֆոնին: Այս մասին հայտնել է կուսակցության մամուլի ծառայությունը:
«ՀՀ գործող իշխանությունից պահանջում ենք սթափ և համարժեք կերպով գնահատել կորոնավիրուսի համաճարակի տարածման վտանգը։ Ըստ այդմ՝ կոչ ենք անում ժամ առաջ ՀՀ ամբողջ տարածքում հայտարարել արտակարգ դրություն և ձեռնարկել համաճարակի տարածումը հնարավորինս կանխելու ու դրա հետևանքները չեզոքացնելու համար անհրաժեշտ միջոցառումներ»,- նշվում է հայտարարության մեջ։
Հաղորդագրության մեջ նաև նշվում են կոչին միացած կուսակցությունները, կազմերպություններն ու անձինք, մասնավորապես, Ժողովրդավարական Հայրենիք կուսակցություն, Հայաստանի Եվրոպական կուսակցություն, Պահպանողական կուսակցություն, Սեպուհական շարժում ռազմահայրենասիրական կազմակերպություն, Արա Պապյան, Ալբերտ Բաղդասարյան, Արկադի Վարդանյան, Արմենակ Կյուրեղյան, Եղիշե Պետրոսյան:
Հիշեցնենք, որ Հայաստանում այս պահին գրանցվել է կորոնավիրուսի վարակման 18 դեպք։ Առաջինը գրանցվել էր մարտի 1–ի գիշերը, փետրվարի 28–ից Թեհրանից Երևան ժամանած ՀՀ 29–ամյա քաղաքացու կրկնակի թեստը տվել է դրական արդյունք։ 31 մարդ, ովքեր շփվել են հիվանդի հետ, մեկուսացվել են Ծաղկաձորի «Գոլդեն Փելես» հյուրանոցում։ Մարտի 11–ին կորոնավիրուս է ախտորոշվել ՀՀ երկու քաղաքացիների (45 և 27 տարեկան) և Իտալիայի 51–ամյա քաղաքացու մոտ, ովքեր վերադարձել են Իտալիայից։ Նրանցից մեկը ջերմում է և ունի աջակողմյան բազալ թոքաբորբ, որի կապակցությամբ ստանում է ախտանշանային բուժում: Մեկուսացվել է 57 մարդ։ Այնուհետև մարտի 12-ին գրանցվել է կորոնավիրուսով վարակման ևս 2 դեպք: Նախօրեին` մարտի 13–ին, հայտնի դարձավ վարակման ևս 2 դեպքի մասին։ Իսկ այսօր հայտնի է դարձել վարակման ևս 5 դեպքի մասին: -0-
