Սոլովյով. Ռուսաստանը կարող է կորցնել վերջին բարեկամին` Հայաստանը

ԵՐԵՎԱՆ, 13 ապրիլի. /Նովոստի–Արմենիա/. Ռուսաստանը կարող է կորցնել իր վերջին իրական բարեկամին` Հայաստանը, ասել է ռուս լրագրող, հեռուստա– և ռադիոհաղորդավար Վլադիմիր Սոլովյովը «Վեստի–FM» եթերում` մեկնաբանելով ապրիլի սկզբին ղարաբաղաադրբեջանական շփման գծում հրետակոծություններից հետո ստեղծված իրավիճակը։

Նա առաջարկել է պատկերացնել հայկական կողմի արձագանքը, երբ ռուս քաղաքական գործիչները հայտարարում են, թե Ռուսաստանը շարունակելու է զենք մատակարարել Ադրբեջանին։ «Այո, մենք նաև Հայաստանին ենք զենք մատակարարում, բայց գուցե պե՞տք է որոշ պայմաններ ներկայացնել»,– նշել է Սոլովյովը։

ՌԴ–ն կշարունակի զենք մատակարարել Ադրբեջանին. Ռոգոզին>>

Նա ավելացրել է, որ Ադրբեջանը Ռուսաստանի համար կարևոր ռազմավարական գործընկեր է, թեև ՌԴ–ի հետ տարբեր միավորումներում չի ընդգրկվել, բայց միաժամանակ նաև մրցակից է։ «Եվ ի՞նչ, որտե՞ղ են ձեր ազգային շահերը։ Ոչ թե կոռումպացված վերնախավերի, այլ ազգային շահը, դրանք տարբեր բաներ են»,– ասել է Սոլովյովը։

Ըստ նրա, ռուսական կողմի դիրքորոշումը ղարաբաղյան հակամարտության կարգավորման գոտում զարմանք է առաջացնում։

«Մենք այժմ կկորցնենք վերջին իրական բարեկամին։ Մենք այնտեղ ռազմակայան ունենք, սահման ենք պաշտպանում։ Գիտե՞ք, թե Հայաստանում հակառուսական տրամադրությունների մակարդակը որքան է բարձրացել»,– նշել է նա։
Ինչպես նշում է Սոլովյովը, պետք չէ ձև անել, թե Ադրբեջանը կարող է Ռուսաստանին փոխարինել Հայաստանը։ «Ադրբեջանի տարածքում մենք ռազմակայաններ չունենք, այդ երկրի սահմանը չենք հսկում, և կուզեի հիշեցնել, որ այնտեղ հաճախակի են դարձել թուրք քաղաքական գործիչների այցերը»,– ընդգծել է նա։

Ըստ նրա, Ռուսաստանը պետք է պատասխանի մի հարցի` «որտե՞ղ են մեր ազգային շահերը»։

«Որ այդ տարածաշրջանում խաղաղությու՞ն լինի», – հաստատ համաձայն եմ։ Կամ որ այնտեղ մեր հաստատած խաղաղության արդյունքում մենք չենք նկատել, թե ինչպես է հերթական երկիրը «պոկվում» մեզանից և փախչում ուրիշ տեղ, ուրիշ մեկի թևի տակ»,– ասել է լրագրողը։

Սոլովյովը տարակուսանք է հայտնել, թե ինչպես է Ռուսաստանը հարաբերություններ կառուցում հեռավոր արտերկրի հետ։

«Պարզապես չեմ հասկանում, թե ինչ ենք մենք ուզում։ Երևանում ամերիկյան դեսպանությունն աշխարհում աշխատողների թվով երկրորդն է։ Իսկ ինչու՞։ Չէ՞ որ Հայաստանը փոքր երկիր է»,– հարցնում է նա։–0--