Քրեական գործ է հարուցվել ժամկետային զինծառայողի մահվան դեպքի առթիվ

ԵՐԵՎԱՆ, 15 մարտի. /Նովոստի–Արմենիա/. Քրեական գործ է հարուցվել նախօրեին հայկական զորամասերից մեկում ժամկետային զինծառայողի մահվան դեպքի առթիվ, հայտնում է investigative.am–ը։

Նախնական տվյալներով` նախօրեի ժամը 16-00-ի սահմաններում, ՀՀ ՊՆ N զորամասի պահպանության շրջանի մարտական դիրքում, կզակի շրջանում ստացած մահացու հրազենային վիրավորումով հայտնաբերվել է պարտադիր ժամկետային զինծառայող, շարքային Կամո Վաչիկի Մարտիրոսյանը:

Դեպքի առթիվ ՀՀ քննչական կոմիտեի զինվորական քննչական գլխավոր վարչության վեցերորդ կայազորային քննչական բաժնում հարուցվել է քրեական գործ ՀՀ քրեական օրենսգրքի 110 հոդվածի 1-ին մասով (ինքնասպանության հասցնելը):

Կատարվում է նախաքննություն:

Կատարվել են դեպքի վայրի, ինչպես նաև Մարտիրոսյանի դիակի արտաքին զննումներ:

Նշանակվել է դատաբժշկական փորձաքննություն:

«Ձեռնարկվում են անհրաժեշտ քննչական և դատավարական գործողություններ՝ դեպքի հանգամանքների բազմակողմանի, լրիվ և օբյեկտիվ հետազոտումն ապահովելու համար»,– նշվում է հրապարակման մեջ։ -0-