«Պատիվ ունեմ» ընդդիմադիր խմբակցությունը Փաշինյանին անվստահություն հայտնելու առաջարկ է ներկայացրել և առաջադրել վարչապետի թեկնածու
ԵՐԵՎԱՆ, 7 հունիսի․ /Նովոստի–Արմենիա/․ «Պատիվ ունեմ» ընդդիմադիր խմբակցությունը հունիսի 7-ին կայացած նիստում միաձայն որոշել է հանդես գալ ՀՀ վարչապետ Նիկոլ Փաշինյանին անվստահություն հայտնելու առաջարկով՝ համաձայն «Ազգային Ժողովի կանոնակարգ» սահմանադրական օրենքի։
Այս մասին իր Ֆեյսբուքյան էջում հայտնել է խմբակցության ղեկավար Հայկ Մամիջանյանը։
Նա նաև նշել է, որ խմբակցությունը Մասիս համայնքի ղեկավար, Հայաստանի Հանրապետական կուսակցության խորհրդի անդամ Դավիթ Համբարձումյանին առաջադրել է վարչապետի թեկնածու։
Համբարձումյանը ևս անդրադարձել է այս թեմային իր Facebook-յան էջում։
«Հայաստանի Հանրապետական կուսակցության ղեկավար մարմնի կողմից ստացա պարտավորեցնող առաջարկ մաս կազմել մեր բոլորիս հայրենիքը ազատագրելու գործին: Սա պարտավորեցնող ու պատվաբեր առաջարկ է, որը ես ընդունել եմ խորապես գիտակցելով պատասխանատվությունը, վտանգները և իհարկե մեր բոլորի երազած հաղթանակի ռեալ հնարավորությունը: Իշխանազավթման առաջին օրից ձեր բոլորի աչքի առաջ ամեն ջանք գործադրել եմ աղետը կանխելու կամ գոնե հեռացնելու ուղղությամբ: Ինձ ու համարյա իմ բոլոր հարազատներին շինծու գործերով բանտարկել են, սակայն իմ կամքի վրա ազդելն անհնար է։ Պայքարի մեջ ես վերկուսակցական մոտեցման կողմնակից եմ: Ինքս բոլոր ընդդիմադիրներին անկեղծ համախմբման կոչ եմ անում և պատրաստ եմ արձագանքել նման բոլոր կոչերին: Ես հայ տղամարդ եմ ու զերծ եմ անառողջ ամբիցիաներից: Նպատակս միայն մեկն է՝ ազատվել չարիքից», – գրել է Համբարձումյանը։
