Պարզվում են ժամկետային հայ զինծառայողի մահվան հանգամանքները

ԵՐԵՎԱՆ, 30 նոյեմբերի. /Նովոստի–Արմենիա/. Քննություն է կատարվում ՀՀ ԱԱԾ սահմանապահ զորքերի ժամկետային զինծառայող, շարքային Գևորգ Խաչատրյանի մահվան հանգամանքները պարզելու համար, ասվում է Հայաստանի քննչական կոմիտեի պաշտոնական կայքում։

Ըստ հաղորդագրության, գործով քննությունը կատարվում է ՀՀ քննչական կոմիտեի ԶՔԳՎ իններորդ կայազորային քննչական բաժնում։

2015թ. նոյեմբերի 28-ին ժամը 23:35-ին, ՀՀ ՔԿ ԶՔԳՎ 9-րդ կայազորային քննչական բաժին հեռախոսագրով հաղորդում էր ստացվել, որ նույն օրը ժամը 22:50-ի սահմաններում սահմանապահ ուղեկալի պարտադիր ժամկետային զինծառայող, շարքային Գևորգ Խաչատրյանը, լինելով պետական սահմանի պահպանության սահմանապահ վերակարգի կազմի մեջ, ստացել է հրազենային վնասվածք և տեղափոխվել զորամասի բուժկետ։

Բուժկետում Գ.Խաչատրյանը մահացել է գլխի գագաթային շրջանի հրազենային վերքից։


Ահազանգից անմիջապես հետո դեպքի վայր է մեկնել քննչական օպերատիվ խումբը՝ ԶՔԳՎ 9-րդ կայազորային քննչական բաժնի պետի տեղակալի գլխավորությամբ։ Նախնական տվյալներով՝ զինծառայողը հրազենային վնասվածքն ստացել է իրեն ամրակցված ԱԿ-74 147 9229 համարի ինքնաձիգով։ Դիակի արտաքին զննությամբ հայտնաբերվել է հրազենային վնասվածք, ինչպես նաև՝ քերծվածքներ սրունքների վրա։

Պարզվել է նաև, որ նախքան կյանքի համար վտանգավոր մարմնական վնասվածք ստանալը զինծառայողը հեռախոսազրույց է ունեցել։

Ըստ Քննչական կոմիտեի հաղորդագրության, մշակվել են աշխատանքային մի շարք վարկածներ, որոնք ստուգելու ուղղությամբ ձեռնարկվում են անհրաժեշտ քննչական միջոցառումներ, նշանակվել փորձաքննություններ։

Դեպքի վերաբերյալ առավել մանրամասն տեղեկություն կտրամարդվի ավելի ուշ։ -0-