ՕՐՕ դաշինքը ոչ լեգիտիմ է համարում ՀՀ նորընտիր խորհրդարանը

ԵՐԵՎԱՆ, 5 ապրիլի. /Նովոստի-Արմենիա/. Հայաստանում ձևավորվել է ոչ լեգիտիմ խորհրդարան և ոչ լեգիտիմ իշխանություն, հայտարարեց «Օհանյան-Րաֆֆի-Օսկանյան» ընդդիմադիր դաշինքի շտաբի պետ Արմեն Մարտիրոսյանը` մեկնաբանելով Հայաստանի խորհրդարանական ընտրությունների արդյունքները:

Չորեքշաբթի մամուլի ասուլիսի ժամանակ Մարտիրոսյանը կարծիք հայտնեց, որ նոր խորհրդարանի միջոցով իշխանությունները չեն կարողանա պաշտպանել պետության շահերը, առաջընթաց գրանցել ղարաբաղյան հակամարտության լուծման հարցում կամ որևէ բարեփոխումներ իրականացնել տնտեսության ոլորտում։

«Մեզ մոտ ձևավորվել է իրավիճակ, երբ հիմնական քաղաքական գործընթացները մնացել են խորհրդարանից դուրս, քանի որ խորհրդարանական ընտրությունները ոչ թե քաղաքական գործընթաց էին, այլ ձայների աճուրդ, ինչպես նաև սև PR-ի արդյունք, մասնավորապես, մեր դաշինքի նկատմամբ», - ընդգծեց Մարտիրոսյանը:

Նրա գնահատականով, հայկական պետությունը մտել է հետընթացի վերջին փուլ: «Դրանից հետո մեզ սպասում է կամ պետության ռեալ փլուզում կամ ժողովուրդը, ի վերջո, ուշքի կգա` գիտակցելով, թե ինչ է տեղի ունեցել», - հայտարարեց նա:

Մարտիրոսյանի կարծիքով, Հայաստանը դեռ երկար է կանգնելու հասարակության շահերի պաշտպանման խնդրի առջև: Նա ավելացրեց նաև, որ ամեն դեպքում «ՕՐՕ» դաշինքը մտադիր է շարունակել իր գործունեությունը: «Մեր դաշինքը և մեզ հետ համագործակցող ուժերը միանշանակ առաջամարտիկ են հասարակության հետաքրքրությունների պաշտպանման հարցում», - ավելացրեց Մարտիրոսյանը:

Անդրադառնալով Երևանի քաղաքապետի կայանալիք ընտրություններին` նա հայտնեց, որ ընտրություններին դաշինքի մասնակցությունը քննարկման փուլում է: «Իմ անձնական կարծիքով, այս պահին այդ ընտրություններին մասնակցել չարժե», - ավելացրեց Մարտիրոսյանը:

Ապրիլի 2–ին հանրապետությունում անցկացվեցին վեցերորդ գումարման խորհրդարանի ընտրությունները, որոնց մասնակցում էր հինգ կուսակցություն և չորս դաշինք։ Այս ընտրություններն ուշագրավ են նրանով, որ երկրի պատմության մեջ առաջին անգամ քվեարկությունը տեղի է ունենում 100 տոկոսանոց համամասնական համակարգով: Այս ընտրություններն առաջին համապետական ընտրություններն են 2015 թ.-ի սահմանադրական փոփոխություններից հետո, որոնք նախատեսում են անցում խորհրդարանական իշխանավարման գործող նախագահի լիազորությունների ժամկետի ավարտից հետո` 2018 թ.–ին։

Բոլոր 2009 ընտրատարածքների տվյալների մշակումից հետո, ԿԸՀ նախնական տվյալների համաձայն, ՀՀ ԱԺ է անցնում չորս քաղաքականո ուժ` իշխող ՀՀԿ–ն (ձայների 49,12 տոկոսը), «Ծառուկյան» դաշինքը (27, 32 տոկոսը), «Ելք» դաշինքը (7,77 տոկոսը), ՀՅԴ–ն (6,57 տոկոսը): -0-