«Օհանյան–Րաֆֆի–Օսկանյան» դաշինքն ուրվագծել է իր նախընտրական առաջնահերթությունները

ԵՐԵՎԱՆ, 13 փետրվարի. /Նովոստի-Արմենիա/. «Ժառանգություն» կուսակցության առաջնորդ, Հայաստանի արտաքին գործերի առաջին նախարար Րաֆֆի Հովհաննիսյանը, «Համախմբում» կուսակցության առաջնորդ, ԱԳ նախկին նախարար Վարդան Օսկանյանը և պաշտպանության նախկին նախարար Սեյրան Օհանյանը երկուշաբթի «Օհանյան–Րաֆֆի—Օսկանյան» նախընտրական դաշինքի ստեղծման հուշագիր են ստորագրել։

«Այսօր մեկնարկում է նոր որակի շարժում, նոր խարիզմայով, նոր ղեկավարությամբ։ «Ժառանգությունը» կանի ամենը, որ հանուն քաղաքացու, հանուն ազատության այդ շարժումը հաջողությամբ պսակվի»,– հուշագրի ստորագրումից հետո ասաց Րաֆֆի Հովհաննիսյանը։

Նրա խոսքով, դաշինքը հանդես է գալիս Հայաստանի ինքնիշխանության, Արցախի տարածքային ամբողջականության համար, կանգնած է սահմանապահ հայ զինվորի կողքին։

«Համախմբում» կուսակցության առաջնորդ Վարդան Օսկանյանն իր հերթին նշեց, որ դաշինքի առաջնորդները գործում են հավասարության սկզբունքով։ Ինչ վերաբերում է համամսանական ցուցակներին, ապա Օսկանյանը հայտարարել է, որ միավորումը դեռ չի որոշել, թե ով է այն ղեկավարելու։
«Դաշինքը բաց է բոլոր ցանկացողների համար։ Մենք պատրաստ ենք միավորվել ընդդիմադիր դաշտի բոլոր ներկայացուցիչների հետ ինչպես նախընտրական ժամանակահատվածում, այնպես էլ ընտրություններից հետո»,– ասաց Օսկանյանը։

Հայաստանի պաշտպանության նախկին նախարար Սեյրան Օհանյանը նկատեց, որ խորհրդարանական ընտրությունները շատ կարևոր են, քանի որ դրանց արդյունքներով է ձևավորվելու երկրի իշխանությունը, հետևաբար, ցանկացած քաղաքացի պետք է իր ավանդը ներդնի այդ գործում։ -0-