ԵՐԵՎԱՆ, 4 մարտի./Նովոստի-Արմենիա/. Հայաստանում սեյսմակայունության առումով ամենաանվտանգ քաղաքը Գյումրին է (նախկին Լենինական), Երևանում իրավիճակն ավելի բարդ է, «Նովոստի-Արմենիա»-ին տված հարցազրույցում ասաց Սեյսմիկ պաշտպանության տարածքային ծառայության գլխավոր փորձագետ, երկրաբանական գիտությունների դոկտոր, պրոֆեսոր Սերգեյ Նազարեթյանը։
«1988-ին Գյումրիում տեղի ունեցավ հզոր երկրաշարժ, փլուզվեցին բոլոր այն շենքերը, որոնք կայունությամբ չէին տարբերվում: Մնացին ամենասեյսմակայունները, հետո Գյումրիում կառուցվեցին ավելի սեյսմակայուն շենքեր, որոնք ի վիճակի են դիմակայել 7-9 բալ ցնցումներին: Երևանում, ցավոք սրտի, իրավիճակը մի փոքր այլ է և մտահոգություն է առաջացնում»,- ասաց Նազարեթյանը։
Ըստ գիտնականի, ամենամեծ անհանգստությունը հարուցում են Խրուշչովի օրոք կառուցված բազմաբնակարան շենքերը։
«Այն ժամանակ երկրի քաղաքական ղեկավարությունը որոշակի նպատակ դրեց՝ հանրապետության բոլոր քաղաքացիներին և բնակիչներին ապահովել մատչելի բնակարաններով։ Սկսվեց լայնածավալ շինարարությունը։ Սակայն շինարարության արագացված տեմպերը բացասաբար են ազդել վերոնշյալ բազմաբնակարան շենքերի որակի վրա։ Այդ շենքերը չեն առանձնանում սեյսմակայունությամբ»,- պարզաբանեց երկրաբանը։
Նա համոզված է, որ ստալինյան ժամանակաշրջանի շենքերն ավելի դիմացկուն են. դրանց զանգվածային և հաստ պատերը լրացուցիչ կայունություն են ապահովում։
Այժմ, ինչպես նշեց փորձագետը, կառուցապատողներն անտեսում են անվտանգության կանոնները։ Շենքերը կառուցվում են լրացուցիչ հարկերով, ինչը զգալիորեն նվազեցնում է դրանց կայունությունը։
«Դպրոցների հետ կապված իրավիճակը ևս ոչ պակաս մտահոգիչ է: Նրանք էլ ուշադրության կարիք ունեն»,- ասաց սեյսմոլոգը։
Նազարեթյանը մատնանշեց նաև առողջապահության ոլորտում առկա լուրջ խնդիրները: Ըստ գիտնականի, բժշկական կենտրոնների շենքերը նույնպես չունեն բարձր սեյսմակայունություն, ինչը արտակարգ իրավիճակի դեպքում կարող է լրացուցիչ ռիսկեր ու խնդիրներ ստեղծել։-0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
