Նախորդ շաբաթվա առավել ուշագրավ նորությունների հնգյակը

ԵՐԵՎԱՆ, 23 սեպտեմբերի. /Նովոստի-Արմենիա/. «Նովոստի-Արմենիա» գործակալությունը ներկայացնում է նախորդ շաբաթվա` սեպտեմբերի 18-22-ի առավել ուշագրավ նորությունների իր տարբերակը:

1. Երևանում անցկացվեց Հայաստան-Սփյուռք վեցերորդ համահայկական համաժողովը: «Փոխադարձ վստահություն, միասնականություն և պատասխանատվություն» վեցերորդ համաժողովը, որը տևեց մինչև սեպտեմբերի 20–ը, նվիրված էր Հայաստանի Առաջին հանրապետության հռչակմանը և մայիսյան հերոսամարտերի 100–ամյակին, ինչպես նաև «Էրեբունի–Երևան 2800» տոնին։

Համաժողովին մասնակցեցին Հայաստանի և Արցախի գերատեսչությունների ղեկավարներ, փորձագետներ, ինչպես նաև Սփյուռքի ականավոր գործիչներ, այդ թվում` Թուրքիայի խորհրդարանի պատգամավոր Գարո Փայլանը։ Զեկույցներով ելույթ ունեցան Բելգիայի, ԱՄՆ–ի, Ռուսաստանի, Արգենտինայի, Լիբանանի, Պորտուգալիայի, Կանադայի, Իրանի, Ռումինիայի, ԱՄԷ–ի և Սիրիայի սփյուռքահայ կառույցների ներկայացուցիչներ։ Ելույթ ունեցավ Հայաստանի նախագահ Սերժ Սարգսյանը, պաշտպանության նախարար Վիգեն Սարգսյանը, Արցախի նախագահ Բակո Սահակյանը, Հայաստանի արտգործնախարար Էդվարդ Նալբանդյանը, ով, մասնավորապես, խոսեց Արցախի անվտանգությանը չսպառնացող տարածքները վերադարձի մասին: Վարչապետ Կարեն Կարապետյանն իր հերթին հայտնեց հաջորդ տարվա աշնանը Տնտեսական համաժողով անցկացնելու մտադրության մասին:

2. Սեպտեմբերի 18-ին ահազանգ ստացվեց, որ Հանրապետության հրապարակում պայթուցիկ է տեղադրված: Ավելի ուշ պարզվեց, որ ահազանգը կեղծ էր:

3. ՀՀ նախագահ Սերժ Սարգսյանը ելույթ ունեցավ Նյու Յորքի ՄԱԿ-ի կենտրոնակայանում կայացած Գլխավոր ասամբլեայի 72-րդ նստաշրջանում, իր խոսքում ասելով, որ հայ–թուրքական երկու արձանագրությունների կենսագործման ուղղությամբ շարունակաբար որևէ դրական տեղաշարժի բացակայության պայմաններում Հայաստանը այդ երկու արձանագրությունները հայտարարելու է առ ոչինչ:

4. Սեպտեմբերի 21-ին Հայաստանը նշեց անկախության 26-ամյակը:

5. ՀՀ ԿԳ նախարարությունը մշակել է Հայաստանի Հանրապետության հանրակրթական ծրագրեր իրականացնող ուսումնական հաստատություններում ռուսաց լեզվի դասավանդման հայեցակարգ` ռուսաց լեզվի դասավանդման բարձր որակ ապահովելու նպատակով։ Ընդ որում, նշվել է, որ հայեցակարգը մշակվել է վարչապետի հանձնարարականով, ինչը Կարեն Կարապետյանը հերքել է լրագրողների հետ զրույցում: Այդ կապակցությամ սեպտեմբերի 22-ին Հայաստանի կրթության և գիտության նախարար Լևոն Մկրտչյանն ասուլիս է հրավիրել, որի ընթացքում ընդգծել է, որ հայերենը եղել և մնում է միակ պետական լեզուն Հայաստանում: -0-