Նախարար. «Պոբեդա» լոուքոսթերի հայտնվելը Հայաստանում կուժեղացնի մրցակցությունը

ԵՐԵՎԱՆ, 26 հոկտեմբերի. /Նովոստի–Արմենիա/. Ռուսական «Պոբեդա» լոուքոսթերի (ընդգրկված է «Աէրոֆլոտ» խմբում) հայտնվելը հայկական շուկայում կուժեղացնի մրցակցությունը, «Նովոստի–Արմենիա» գործակալությանը հայտնեց տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը։

Նախորդ շաբաթ Ռոսավիացիան հայտնել էր «Պոբեդա» լոուքոսթերին Գյումրու օդանավակայանից դեպի Մոսկվա և հետադարձ չվերթեր տրամադրելու թույլտվության վերաբերյալ։

«Գյումրիում «Պոբեդա» լոուկոստերի չվերթերի իրականացումը մրցակցություն կստեղծի և կազդի Հայաստանում ավիատոմսերի գների վրա ընդհանուր առմամբ։ Բայց այդ փոփոխությունները կկատարվեն աստիճանաբար»,– ասաց Մարտիրոսյանը։

Ըստ նրա, մեծ դեր է խաղում նաև այն, որ «Շիրակ» օդանավակայանի սպասարկման ծախսերն ավելի փոքր են, քան «Զվարթնոց» միջազգային օդանավակայանում։

Հայաստանի քաղաքացիական ավիացիայի գլխավոր վարչության պաշտոնական հաղորդման համաձայն, 2016 թվականի վերջից «Պոբեդա» ավիաընկերությունը կսկսի շաբաթական երեք չվերթի իրականացումը Մոսկվա («Վնուկովո» օդանավակայան) – Գյումրի («Շիրակ» օդանավակայան) ուղղությամբ և հետադարձ։ Ավիատոմսերի արժեքը կկազմի սկսած 10 հազար դրամից (մոտ 21 դոլար)։

«Պոբեդան» «Աէրոֆլոտ» խմբի էժան փոխադրող է։ Ընկերության չվերթերը կատարվում են Boeing-737-800 տասներկու ինքնաթիռներով 58 ուղղություններով, այդ թվում` 8 միջազգային ուղղություններով (նաև Fly & Bus ծառայության միջոցով)։ Ավելի վաղ «Պոբեդան» Դոնի Ռոստովի և Երևանի միջև թռիչքների թույլտվություն էր ստացել։

Ներկայում Հայաստանում գործում է երկու օդանավակայան` Երևանի «Զվարթնոցը» և Գյումրու «Շիրակը», որոնք շահագործում է «Արմենիա – Միջազգային օդանավակայաններ» ՓԲԸ–ն կոնցեսիոն կառավարման պայմանագրին համապատասխան։ Վերջինիս սեփականատերն արգենտինյան American International Airports–ն է, որը պատկանում է արգենտինահայ քաղաքացի Էդուարդո Էռնեկյանին։ -0-