Նախապատրաստվում է Հայոց ցեղասպանության զոհերի բացառիկ շտեմարանը

ԵՐԵՎԱՆ, 22 ապրիլի. /Նովոստի-Արմենիա/. Հայաստանի ազգային արխիվը 1915 թվականին Օսմանյան կայսրությունում Հայոց ցեղասպանության զոհերի բացառիկ շտեմարան է պատրաստում, հայտնեց արխիվի տնօրեն Ամատունի Վիրաբյանը:

«Շտեմարանում այս պահին շուրջ 100 հազար մարդու վերաբերյալ տեղեկություն է պահվում, աշխատանքը շարունակվում է, և կասկած չունեմ, որ մի օր մենք կհայտարարենք, որ աշխատանքներն ավարտված են»,- ասաց Վիրաբյանը, ավելացնելով, որ մշտապես նաև անուններ և նոր փաստեր են ի հայտ գալիս, որոնք ներառվում են տվյալների բազայում:

«Տվյալների բազայի ստեղծման աշխատանքները տարվում են 2014 թվականից, ամեն տարի մենք համալրում ենք այն 30 հազար նոր անուններով և տվյալներով: Տվյալների բազայում նշվում են մարդու անունը, ազգանունը, ծննդյան տարեթիվը, վայրը, մահվան ամսաթիվն ու վայրը, նրա մասնագիտությունը, եթե երեխա է՝ ապա նաև ծնողների անունները»,- ասաց Վիրաբյանը:

Նա ավելացրեց, որ տեղեկությունը հավաքվում է ամբողջ աշխարհից՝ Եգիպտոսի հայկական թեմի արխիվից, Փարիզի «Նուբարյան Մատենադարան» գրապահոցի արխիվից և այլն, բայց թուրքական արխիվների հասանելիություն ստանալ առայժմ չի հաջողվել:

«Այժմ թուրքական արխիվները որոշակիորեն հանրայնացված են, քան հինգ տարի առաջ, և այնտեղ իսկապես պահպանվել են բնակչության մարդահամարի մասին տվյալները: Սակայն խնդիրն այն է, որ մենք չունենք օսմաներենի տիրապետող մասնագետներ՝ դրանք թարգմանելու համար, չէ՞ որ դրանք ոչ թե թուրքերեն են, այլ հենց օսմաներեն»,- ասաց Վիրաբյանը: -0-