Մինչև 35 աստիճան ցուրտ է սպասվում Հայաստանում առաջիկայում

ԵՐԵՎԱՆ, 16 դեկտեմբերի. /Նովոստի–Արմենիա/. Օդի ջերմաստիճանը Հայաստանում դեկտեմբերի 16-19–ին կնվազի 12-16 աստիճանով, հայտնում է Հայհիդրոմետկենտրոնը։

Ամենից ցուրտ կլինի Շիրակի, Կոտայքի, Գեղարքունիքի մարզերում, ինչպես նաև Արագածոտնի և Վայոց Ձորի լեռներում, որտեղ դեկտեմբերի 18–ի և 19–ի գիշերը սնդիկի սյունը ցույց կտա 30-35 աստիճան ցուրտ։

Երևանում ուրբաթ օդի ջերմաստիճանը ցերեկը կկազմի 3-5 աստիճան ցուրտ, իսկ հաջորդ օրերին աստիճանաբար կնվազի, և երկուշաբթի ու երեքշաբթի ցերեկային ժամերին կհասնի 8-10 աստիճան ցրտի։ Միաժամանակ, դեկտեմբերի 18-19–ի գիշերը մայրաքաղաքում կցրտի մինչև -18 ... -20 աստիճան։

Հանրապետության մի շարք մարզերում դեկտեմբերի 16-17–ին սպասվում է թույլ ձյուն, իսկ դեկտեմբերի 18–20–ին կանխատեսվում է առանց տեղումների եղանակ։ Ուրբաթ և շաբաթ օրերին Երևանում կլինի ոչ մեծ ամպամածություն, հնարավոր է թույլ ձյուն։

Քամին կլինի հյուսիս–արևմտյան` 3-8 մետր վայրկյան արագությամբ։ -0-