Մի ծաղկով գարուն. հայի բողոքի ակցիան Մոսկվայի ԱԳՆ շենքի մոտ

ԵՐԵՎԱՆ, 13 ապրիլի. /Նովոստի–Արմենիա/. Հայաստանի քաղաքացի, 43–ամյա Վախթանգ Սարգսյանը լռության միանձնյա ակցիա է անցկացրել Ռուսաստանի արտաքին գործերի նախարարության շենքի մոտ` ի նշան բողոքի ղարաբաղյան իրադարձությունների և ռուսական իշխանությունների քաղաքականության դեմ։

Տղամարդը Ռուսաստանի ԱԳՆ շենքի մոտ կանգնել է 40 րոպե` «Դադարեցրեք զենքի վաճառքը ագրեսորին` Ադրբեջանին» պաստառով։

«Ես որոշել եմ բողոքի ակցիա անցկացնել և չեմ համաձայնեցրել գործողություններս Մոսկվայի հայկական համայնքի հետ։ Իմ մտադրությունների մասին գիտեին միայն ընկերներս, ովքեր պետք է ինձ օգնեն»,– ասել է Սարգսյանը Հայաստանի հանրային ռադիոյին տված հարցազրույցում։

Նա պարզաբանել է, որ իր ընկերներից մեկը լուսանկարել է, իսկ մյուսը` տեսագրել այն, որ ինքը ոչ մի օրենք չի խախտում և հասարակական կարգին չի խանգարում։

«Դա աննախադեպ իրավիճակ էր և անցորդներրի, և շենքի անվտանգությունն ապահովող ոստիկանների համար, քանի որ մինչ այդ ոչ ոք ցույցեր չի անցկացրել Ռուսաստանի ԱԳՆ շենքի մոտ»,– ասել է նա։

Սարգսյանը հայտնել է նաև, որ ինքը և իր ընտանիքն այժմ անվտանգության մեջ են, և իրենց նկատմամբ ոչ մի սահմանափակող միջոցներ չեն կիրառվել։

Վախթանգ Սարգսյանը ծնվել և մեծացել է Երևանում, այժմ ապրում է Մոսկվայում կնոջ և երեխայի հետ։

Ապրիլի 2–ից 5–ն ադրբեջանական ԶՈՒ–ն ղարաբաղաադրբեջանական շփման գծի հարավային, հարավարևելյան և հյուսիսարևելյան ուղղություններով ձեռնարկել է բացահայտ հարձակվողական գործողություններ` հրետանիով, զրահապատ տրանսպորտային միջոցներով և ավիացիայով: ԼՂՀ պաշտպանության բանակը հաջողությամբ ճնշել է հակառակորդի գործողությունները` հասցնելով մեծ վնասներ։–0–