ԵՐԵՎԱՆ, 15 հունվարի. /Նովոստի–Արմենիա/. Հայաստանի վարչապետ Նիկոլ Փաշինյանը քննադատեց Երևան–Էջմիածին ճանապարհը փակած ցուցարարներին։ Այս մասին նա ասաց Facebook–ի իր էջի ուղիղ եթերից։ Փաշինյանը տարակուսանք հայտնեց այն կապակցությամբ, որ ցուցարարները Երևանից Էջմիածին տանող ճանապարհը փակում էին` արդարացնելով իրենց գործողությունները գործող իշխանությունների` հեղափոխության օրերին ճանապարհներ փակելու օրինակով։
«Մենք ճանապարհներ էինք փակում, քանի որ երկրում չկար ժողովրդի վստահությունը վայելող իշխանություն։ Մենք գիտեինք, որ ժողովուրդն իշխանափոխություն է ուզում։ Արդյունքում հասկացանք, որ ճիշտ էինք։ Եվ այսօր այս մարդիկ ասում են, որ իրենց իշխանության կողմից են և փողոց են փակում, իսկ այն մարդիկ, ովքեր չէին կարողանում անցնել այդ ճանապարհով, իշխանությու՞ն չեն»,– ասաց նա։
Загружается новость ...
"Право"
Փաշինյանը նշեց, որ ճանապարհին մնացած մարդիկ և Հայաստանի բոլոր քաղաքացիներն իրենց իշխանությունը ձևավորել են ազատ և անկախ ընտրությունների միջոցով։ Նա միանշանակ ավելացրեց, որ ժողովուրդն իշխանություն է ձևավորել, այդ թվում, որ իշխանությունները կարողանան ապահովել այդ ճանապարհների հասանելիությունը։
«Այսօր ասում են, թե մենք ճանապարհներ ենք փակում, որովհետև Մանվելին ազատ են արձակել։ Այնպիսի տպավորություն է, թե իրենք ձերբակալել են Մանվել Գրիգորյանին, իսկ մենք ազատել ենք։ Այս բացահայտումները կատարվել են մեր իշխանության օրոք։ Եվ ճանապարհներ փակելու բոլոր գործողություններն ուղղված են ուղղակի Հայաստանի կառավարության դեմ»,– ընդգծեց վարչապետը։
Փաշինյանը հավաստիացրեց, որ Մանվելի Գրիգորյանի խափանման միջոցի փոփոխությունը չի նշանակում արդարացում, նշելով, որ այդ գործը քննվելու է մինչև վերջ և կհասնի մինչև դատավարություն։
«Դուք չեք կարող ճանապարհներ փակել, քանի որ չունեք դրա լիազորությունները։ Դուք նաև չեք ստացել լիազորություններ ժողովրդից։ Ժողովուրդն արդեն ընտրել է իր իշխանությունը, որի գործունեության տիրույթում է ճանապարհների անցանելիության ապահովումը»,– ասաց նա։
Փաշինյանը կոչ արեց ցուցարարներին խաղաղ կերպով արտահայտել սեփական կարծիքը, չտրվել մանիպուլյացիաների և «չխառնել թացը չորի հետ»։ -0-