Մենք փակ չենք պահում սահմանը, դա Ռուսաստանի քաղաքականությունն է, որ չեն ընդունում. արտգործնախարարը՝ ՌԴ մեկնել ցանկացողներին

ԵՐԵՎԱՆ, 12 օգոստոսի./Նովոստի-Արմենիա/. Այսօր՝ օգոստոսի 12-ին կառավարության շենքի դիմաց ՌԴ-ում բնակվող և այնտեղ արտագնա աշխատանքի մեկնել ցանկացող քաղաքացիները բողոքի ակցիա էին իրականացնում: Նրանք բողոքում էին փակ սահմանների դեմ:

Քանի որ քաղաքացիները ցանկանում են գնալ ՌԴ, սակայն փակ սահմանների պատճառով դրա հնարավորությունը չունեն, վերջիններս պահանջում էին գոնե երկու շաբաթով բացել սահմանները, որպեսզի մեկնել ցանկացողները կարողանան գնալ ՌԴ: 

Հիշեցնենք, որ Ռուսաստանն օգոստոսի 1-ից վերականգնել է միջազգային ավիահաղորդակցությունը, սակայն ՀՀ քաղաքացիներ համար մուտքը դեռևս բաց չէ:  

Նաև նրանք ուզում էին հանդիպել կամ փոխվարչապետ Տիգրան Ավինյանի, կամ վարչապետ Նիկոլ Փաշինյանի հետ։

«Իմ ընտանիքը մնացել է ՌԴ-ում, ես Հայաստան եկա բուժման նպատակով և մինչև հիմա մնացել եմ, չեմ կարողանում գնալ։ Մի ամիս հետո նորից կասեն՝ մի ամսով էլ ենք երկարացնում արտակարգ դրությունը, ժողովուրդը հոգնել է արդեն։ Ժողովուրդը 3 տարեկան երեխա չէ, որ խաբեն ամեն օր, չի կարելի»,- հայտնեց ցուցարարներից մեկը լրագրողներին:

Բողոքի ակցիայի մասնակիցների հետ հանդիպում ունեցավ արտգործնախարար Զոհրաբ Մնացականյանը: 

«Մենք փակ չենք պահում սահմանը, բայց դա Ռուսաստանի քաղաքականությունն է, որ չեն ընդունում։ Ռուսաստանն այդ քաղաքականությունն իրականացնում է բոլոր երկրների համար»,- նշեց ԱԳ նախարարը՝ հիշեցնելով ակցիայի մասնակիցներին, որ երկրում ստեղծված անհարմարությունները համավարակով են պայմանավորված:

«Ամբողջ աշխարհի սահմանները բաց են, իսկ մենք դեռ երկարացնում ենք արտակարգ դրությունը»,- հայտնեց քաղաքացիներից մեկը:

Ռուսաստան մեկնել ցանկացող քաղաքացիները նաև հանդիպեցին վարչապետի օգնական Նաիրի Սարգսյանին, ով նշեց այսօր կառավարության նիստի ժամանակ ընդունված որոշումը՝ արտակարգ դրության երկարաձգման և մեղմացումների մասին: Նա հայտնեց, որ սահմանների հետ կապված հարցերին չի տիրապետում: -0-