ԵՐԵՎԱՆ, 17 հոկտեմբերի. /Նովոստի–Արմենիա/. Հայաստանի կառավարությունը մշակում է մեգանախագծերում կապիտալ ներդրումների ռազմավարությունը, հինգշաբթի կառավարության նիստում ասաց վարչապետ Նիկոլ Փաշինյանը։
Նա նշեց, որ վերջին ժամանակներում որպես խնդիր նշվում է պետբյուջեի թերակատարումը կապիտալ ծախսերի մասով։
«Սակայն վերլուծությունը ցույց է տվել, որ նախորդ տարվա համեմատ մենք ավելի շատ կապիտալ ծախսեր ենք իրականացրել, բայց առայժմ չենք հասել ծրագրած ցուցանիշների, այդ թվում այն պատճառով, որ որակի շատ բարձր չափանիշներ ենք սահմանել, իսկ եթե դրա վրա աչք փակենք, ապա նույնիսկ կարող ենք գերակատարել պլանները»,– ասաց Փաշինյանը։
Վարչապետը միաժամանակ նշեց, որ իր այն արտահայտությունը, որ երկրում փողի խնդիր չկա, քաղաքական շահարկումների առիթ տվեց, և որոշ գործիչներ առաջարկել են այդ փողերը բաժանել մարդկանց։
«Ես վերահաստատում եմ, որ փողի հետ կապված խնդիրներ չունենք։ Բայց դա չի նշանակում, որ պետք է վերցնենք և բաժանենք դա։ Այդ դեպքում փողերի արժեքը կնվազի, և 100 հազար դրամի կարելի կլինի գնել ավելի պակաս, քան 10 հազար դրամով։ Երկրում գնանկում կարձանագրվի»,– ասաց վարչապետը։
Նա նշեց, որ այս պահին Հայաստանը եվրապարտատոմսեր է թողարկել։ Ներքին շուկայում շրջանառվող ՊԳՊ–ներն ավելի քիչ են, քան դրանց պահանջարկը, իսկ պետբյուջեի եկամտային մասն 9 ամիսների ընթացքում աճել է 21.6 տոկոսով։
«Մենք այժմ աշխատում ենք ռազմավարության վրա և անհրաժեշտ ենք համարում տվյալ միջոցների ներգրավումը կապիտալ ներդրումների մեջ, որոնք պայմանականորեն անվանում ենք մեգանախագծեր։ Դրանց իրացման արդյունքում բնակչության մոտ փող կհայտնվի, որն արժեք կունենա։ Դա ավելի լավ է, քան պարզապես մարդկանց փող բաժանելը»,– ասաց Փաշինյանը։
Նրա խոսքով, որոշ երկրներում նման քաղաքականությունը հանգեցրել է նրան, որ 1 կգ հացի դիմաց ստիպված վճարել են 2 կգ փող։
«Մենք այդ ճանապարհով չենք գնա»,– ասաց Փաշինյանը։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում