Մայրն ու դուստրը նպաստել են պոռնկությամբ զբաղվելուն. նրանց մեղադրանք է առաջադրվել

ԵՐԵՎԱՆ, 13 հուլիսի. /Նովոստի–Արմենիա/. Հայաստանում բացահայտվել է պոռնկությամբ զբաղվելուն նպաստելու դեպք։

Ինչպես հայտնում է Հայաստանի քննչական կոմիտեի մամուլի ծառայությունը, նախաքննությամբ փաստական տվյալներ են ձեռք բերվել առ այն, որ Շիրակի մարզի բնակչուհին, ամուսնալուծությունից հետո չունենալով այլ բնակության վայր, մոր հետ միասին բնակվել է վերջինիս ծանոթի՝ 64-ամյա կնոջ բնակարանում, որտեղ ապրել է նաև տարեց կնոջ դուստրն իր անչափահաս երեխաների հետ։


Ելնելով ֆինանսական ծանր վիճակից` տանտիրուհին իր դստեր հետ միասին առաջարկել է իրենց տանը բնակություն հաստատած ամուսնալուծված կնոջը զբաղվել մարմնավաճառությամբ, ով էլ համաձայնել է դրան։

Մինչդատական վարույթի ընթացքում ձեռք բերված բավարար ապացույցների հիման վրա՝ 64-ամյա կնոջը և վերջինիս դստերը մեղադրանք է առաջադրվել՝ ՀՀ քրեական օրենսգրքի 262-րդ հոդվածի 2-րդ մասի 1-ին կետի (Պոռնկությամբ զբաղվելու համար որջեր կազմակերպելը, պահելը կամ կավատությունը) հատկանիշներով:

Քրեական գործը՝ մեղադրական եզրակացությամբ, ուղարկվել է նախաքննության օրինականության նկատմամբ հսկողություն իրականացնող դատախազին: -0-