Մասսայական վազք Երևանում` հանուն հաղթանակի և խաղաղության

ԵՐԵՎԱՆ, 6 մայիսի. /Նովոստի–Արմենիա/. Հաղթանակի տոնին ընդառաջ առաջին մասսայական վազքը կմեկնարկի Երևանում, հայտնում է ՀՀ սպորտի և երիտասարդության հարցերի նախարարի մամուլի ծառայությունը։

Վազքը կմեկնարկի կիրակի` մայիսի 7-ին ժամը 10.00-ին, Երևանի Հաղթանակի զբոսայգուց։

Հաղորդման մեջ նշվում է, որ վազքը կրում է «Հանուն հաղթանակի և խաղաղության» նշանաբանը:

Մասնակիցները վազքով կանցնեն ավելի քան 4 կմ՝ Հաղթանակի զբոսայգու Անհայտ զինվորի հուշարձանի հարակից տարածքից մինչև Հանրապետության հրապարակ: Նախատեսվում է, որ վազքին կմասնակցի շուրջ 700 մարդ:

Նախքան մասսայական վազքի մեկնարկը ծաղկեպսակներ կդրվեն Անհայտ զինվորի հուշարձանին:

«Միջոցառումը համատեղ կազմակերպել են ՀՀ սպորտի և երիտասարդության հարցերի նախարարությունը, Հայաստանի եռամարտի ֆեդերացիան և Երևանում «Ռուսական գիտության և մշակույթի կենտրոնը»՝ Հայաստանի Հանրապետությունում Ռուսաստանի Դաշնության դեսպանատան աջակցությամբ»,– նշվում է հաղորդման մեջ։ -0-