Լինել, թե չլինել. Հայաստանի կառավարությունը փոխարինման վտանգի տակ է. թերթ

ԵՐԵՎԱՆ, 13 մայիսի. /Նովոստի-Արմենիա/. ՀՀ վարչապետ Հովիկ Աբրահամյանը նախօրեին տեղի ունեցած կառավարության նիստից առաջ բավականին ծավալուն հայտարարությունով է հանդես եկել` ասելով, որ որոշում է ընդունվել փոխել կառավարման համակարգը` այն դարձնելով ավելի սեղմ: Կառավարության ղեկավարը խոստացել է նաև կրճատել ծախսերը և պայքարել կոռուպցիայի դեմ, գրում է «Ժողովուրդ» թերթը:

«Այլ խոսքերով` Հովիկ Աբրահամյանը երկու տարի որպես ՀՀ վարչապետ պաշտոնավարելուց հետո, ի վերջո, չդիմացավ և ինքն էլ հայտարարեց կոռուպցիայի դեմ «խաչակրաց արշավանք» սկսելու մասին», - գրում է պարբերականը:

Գրառման հեղինակները պնդում են, թե առաջին հայացքից կարող է թվալ, որ ՀՀ գործող վարչապետը նախորդներից ետ չմնալու համար է «ռեֆորմատոր» ձևանում, սակայն իրականությունն այլ է:

Պարբերականում նշվում է, որ, շրջանառվող լուրերի համաձայն, Սերժ Սարգսյանն իշխանական վերնախավին տեղեկացրել է, որ պատրաստվում է փոխել կառավարությունը, քանի որ հին դեմքերից ազատվելու հանրային պահանջը գնալով ուժգնանում է:

«Հովիկ Աբրահամյանն էլ որոշել է հարձակման անցնել և «ռեֆորմատորի» կերպարով հանդես գալ` ցույց տալով, որ իրեն հանելն այնքան էլ ճիշտ չէ: Ի վերջո, սիրուն չի լինի պաշտոնանկ անել մի պաշտոնյայի, ով հայտարարում է կոռուպցիայի դեմ պայքար սկսելու մասին: -0-