Լավրով. Երևանը չի մերժել ղարաբաղյան հակամարտության Կազանի փաստաթուղթը

ԵՐԵՎԱՆ, 22 ապրիլի. /Նովոստի–Արմենիա/. Երևանը չի մերժել ղարաբաղյան կարգավորման Կազանի փաստաթուղթը, ուրբաթ ասաց ՌԴ ԱԳՆ ղեկավար Սերգեյ Լավրովն իր հայ գործընկեր Էդվարդ Նալբանդյանի հետ համատեղ ճեպազրույցում։

Ղարաբաղյան հակամարտության կարգավորման բանակցությունների շրջանակում 2011 թվականին Կազանում ԵԱՀԿ Մինսկի խմբի համանախագահ երկրները ներկայացրել են հակամարտության լուծման հիմնական սկբունքների «ճանապարհային քարտեզ»։ Սակայն Կազանում առաջընթաց չգրանցվեց, քանի որ Ադրբեջանը մերժեց այդ առաջարկությունները։

«Ձեր հարցի պատասխանը շատ պարզ է։ Որպես այն իրադարձությունների անմիջական մասնակից` կարող եմ ասել, որ Հայաստանը չի մերժել Կազանի փաստաթուղթը»,– ասաց Լավրովը Երևանում։

Հայաստանի արտաքին գործերի նախարար Էդվարդ Նալբանդյանն իր հերթին ընդգծեց, որ Բաքուն ոչ միայն Կազանում է առաջարկություններ մերժել։

«Բազմիցս ասել եմ, որ նախքան Կազանն Ադրբեջանը դա արել է և Սոչիում, մինչև Սոչին` Մոսկվայում, մինչև Մոսկվան` Աստրախանում, մինչև Աստրախանը` Սանկտ Պետերբուրգում և այլն։ Այդպես մենք կարող ենք հասնել նաև Փարիզյան բանակցությունների տասը տարի առաջ»,– ասաց Նալբանդյանը։

Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։ 1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։

Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։

1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։

Զինադադարի ռեժիմի մասին համաձայնությունը պահպանվում է մինչ այժմ։ 1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։ -0-