Կարապետյան. կանենք հնարավորը, որ մայր դարձած կինն իրեն զգա պետության հոգատարության ներքո

ԵՐԵՎԱՆ, 7 ապրիլի. /Նովոստի–Արմենիա/. Հայաստանի վարչապետ Կարեն Կարապետյանը շնորհավորել է հայ կանանց Մայրության և գեղեցկության օրվա կապակցությամբ:

Երկրի կառավարության ղեկավարը մայրերին, տատիկներին, կանանց, քույրերին, դուստրերին մարդկային պարզ երջանկություն է մաղթել, ցանկանալով, որ հայ օջախներում միշտ լինի ջերմություն, սեր, հոգատարություն և բարություն:

«Մայրերը հայ օջախների հենքն են և սյունը: Այսօր մենք ուղղակի օգտվում ենք առիթից և ևս մեկ անգամ արտահայտում մեր անսահման սերն ու հարգանքը ձեր նկատմամբ»,– նշվում է վարչապետի շնորհավորական ուղերձում։

Վարչապետը հաավստիացրել է, որ իշխանությունները տրամադրված են անել ամեն հնարավորը, որ մայրությունը Հայաստանում լինի պետության կողմից առավելագույնս պաշտպանված և մայր դարձած կինն իրեն զգա պետության հոգատարության ներքո:

«Այսօր ևս մեկ անգամ ուզում եմ նշել, որ կանայք մեր հասարակության մեջ շատ կարևոր դեր են զբաղեցնում և մենք հետևողական ենք լինելու, որպեսզի կանայք մեր երկրում ունենան բոլոր հնարավորություններն իրենց դրսևորելու և ներգրավված լինելու մեր երկրի զարգացման բոլոր գործընթացներում»,– ընդգծել է Կարապետյանը։ -0-