ԱՆ. Հուրգադայում տուժած հայ կինը 18 վնասվածք ունի (ՄԱՆՐԱՄԱՍՆԵՐ)

ԵՐԵՎԱՆ, 11 օգոստոսի. /Նովոստի–Արմենիա/. Հուրգադայոի ծովափում հարձակումից տուժած Հայաստանի քաղաքացին 18 վերք է ստացել, վնասված են նրա լյարդն ու անոթները, կան հեմատոմներ։ Այդ մասին հանրապետության առողջապահության նախարար Լևոն Ալթունյանի հետ հանդիպման ընթացքում հայտնեց «Էրեբունի» բժշկական կենտրոնի ընդհանուր և կրծքային վիրաբուժության կլինիկայի ղեկավար Արտակ Հովհաննիսյանը, ով զննել է տուժածին Կահիրեի հիվանդանոցում։

Պրոֆեսոր Հովհաննիսյանն օգոստոսի 3–ին մեկնել է Կահիրե` եգիպտացի գործընկերներին աջակցելու համար և առաջին իսկ օրը զննել է վիրավոր կնոջը։

«Մեր 46–ամյա հայրենակցուհու վիճակն օգոստոսի 3–ի դրությամբ որակվել է որպես կայուն ծանր և ստացված վերքերին ու վիրաբուժական միջամտություններին համապատասխան։ Նա երեք անգամ լապարոտոմիայի է ենթարկվել։ Կինը ստացել է 18 վնասվածքներ, որոնցից երեքը` թափանցող։ Դրա հետևանքով վնասվել են լյարդը, ստոծանին, աղեկալի անոթները, թոքամզային խոռոչները, առաջացել են հեմատոմներ»,– նշվում է Առողջապահության նախարարության մամուլի ծառայության հաղորդման մեջ։

Հայ վիրաբույժը եգիպտացի տարբեր մասնագետների հետ իրականացրել է երեք կոնսիլիում։ Քննարկելով տուժածի վիճակը` նշանակվել են լրացուցիչ հետազոտություններ, որոնց արդյունքներով կատարվել են կոնսերվատիվ բուժման լրացումներ։

Արտակ Հովհաննիսյանը նշել է, որ դրանց արդյունքում, հաջորդ օրվանից սկսած, հիվանդի մոտ նկատվել է վիճակի դրական դինամիկա։ Սկսել են գործել աղիները, ինտոկսիկացիոն երևույթները նկատելիորեն պակասել են։


«Հիվանդի մոտ առկա են շնչառական անբավարարության որոշակի խնդիրներ, քանի որ պլևրալ 2 խոռոչում կային հեղուկային կուտակումներ և վիրավորման հետևանքով կայացած արյունահոսության ֆոնի վրա որոշակի արյան մակարդուկներ ձախ պլևրալ խոռոչում։ Ենթալյարդային տեղակայմամբ դրենաժային խողովակից մեկ օրվա ընթացքում կուտակվել էր 450-500մլ լեղային արտադրություն»,-ներկայացրել է պրոֆեսորը` հավելելով, որ Եգիպտոսում ՀՀ դեսպանությունից ստացված տեղեկատվությամբ վիրավորումներ ստացած ՀՀ քաղաքացին օգոստոսի 9-ին վիճակի բարելավումով ինտենսիվ թերապիայի բաժանմունքից տեղափոխվել է հիվանդասենյակ։

Հայաստանի քաղաքացին օգոստոսի 9–ին ինտենսիվ թերապիայի բաժանմունքից տեղափոխվել է սովորական պալատ։

Մամուլի ծառայությունից հայտնեցին, որ պրոֆեսոր Արտակ Հովհաննիսյանը մշտական կապի մեջ է հյուպատոս Ստեփան Գևորգյանի հետ։ Բժշկի խոսքով հիվանդի տեղափոխման հարցը կքննարկվի նրա վիճակի հետագա որոշակի բարելավումից հետո։

Հուլիսի 14–ին Հուրգադայի ծովափերից մեկում զբոսաշրջիկների վրա հարձակում է տեղի ունեցել։ 28–ամյա տղամարդը դանակով անցել է հասարակական ծովափից դեպի Հուրգադայի հյուրանոցների մեկի ծովափ, որտեղ հարձակվել է օտարերկրացի զբոսաշրջիկների վրա։ Հարձակման արդյունքում զոհվել են գերմանացի երկու կանայք, վիրավորվել են Հայաստանի, Չեխիայի և Ռոիսաստանի քաղաքացիներ։ Հուլիսի 15–ին կանայք տեղափոխվել են Կահիրե։ -0-