ՀՔԾ-ն կասկածի տակ է դրել Ռոբերտ Քոչարյանի փաստաբանի կոմպետենտությունը

ԵՐԵՎԱՆ, 5 սեպտեմբերի. /Նովոստի-Արմենիա/. Ընդգծելով հանրության` օբյեկտիվ իրազեկում ստանալու իրավունքը` Հայաստանի հատուկ քննչական ծառայությունն անդրադարձել է մարտի 1-2-ի դեպքերի վերաբերյալ քննվող քրեական գործով մեղադրյալ Ռոբերտ Քոչարյանի պաշտպան Արամ Օրբելյանի`մամուլի ասուլիսում արած հայտարարությանը:

Ռոբերտ Քոչարյանն ավելի վաղ մտադիր էր մեկնել Գերմանիա բժշկական զննության, սակայն քննչական մարմնի կողմից արգելանք է դրվել այդ գործողության վրա: Այդ կապակցությամբ չորեքշաբթի Արամ Օրբելյանը հայտնել է, որ 2017 թվականին Օմբուդսմենը դիմել է Հայաստանի Սահմանադրական դատարան, որը որոշում է կայացրել այն մասին, որ մեղադրյալի անձնագիրը չի կարող պահվել քննություն կատարող մարմնի կողմից:

Ինչպես հայտնում է գերատեսչության մամուլի ծառայությունը, Օրբելյանը դիմել է
«ՀՀ քաղաքացու անձնագրի մասին» ՀՀ օրենքի այն դրույթին, համաձայն որի` մեղադրյալի անձնագիրը պահվում է վարույթն իրականացնող մարմնում, ՀՀ մարդու իրավունքների պաշտպանի դիմումին համապատասխան, 2017 թվականին ճանաչվել է ՀՀ Սահմանադրությանը հակասող:

ՀՀ հատուկ քննչական ծառայությունից հայտնում են, որ իրենք քաջածանոթ են ՀՀ Սահմանադրական դատարանի 2017 թվականի ապրիլի 4-ի որոշման բովանդակությանը, հարկ է համարելով նշել, որ հիշյալ որոշմամբ «ՀՀ քաղաքացու անձնագրի մասին» ՀՀ օրենքի որևէ նորմ, այդ թվում` «Կասկածյալի կամ մեղադրյալի անձնագիրը ժամանակավորապես վերցնում է հետաքննության կամ նախաքննության մարմինը» դրույթը, ՀՀ Սահմանադրությանը հակասող և անվավեր չի ճանաչվել, որպիսի պայմաններում առնվազն անհասկանալի է պաշտպանի նման` իրականությանը չհամապատասխանող և միևնույն ժամանակ չհիմնավորված ինքնավստահությամբ հնչեցրած դիրքորոշումը:

«Հաշվի առնելով վերոգրյալը` կարող ենք ենթադրել, որ Արամ Օրբելյանի կողմից նման դիրքորոշման բարձրաձայնումը կամ ՀՀ ՍԴ որոշմանը ծանոթ չլինելու արդյունք է, կամ հետապնդում է փաստերը խեղաթյուրելով հասարակությանը մոլորեցնելու և ՀՀ հատուկ քննչական ծառայության օրինական գործունեությունը ստվերելու նպատակ, ինչը կասկածի տակ է դնում հենց պաշտպանի` որպես փաստաբանի և իրավաբանի կոմպետենտությունը, ուստի հորդորում ենք այսուհետ ձեռնպահ մնալ նման գործելաոճից»,- ասվում է հաղորդագրության մեջ: -0-