ԵՐԵՎԱՆ, 17 ապրիլի./Նովոստի–Արմենիա/. ՀՀ ԱԺ–ն ուրբաթ երկրորդ և վերջնական ընթերցմամբ հավանություն տվեց «Մաքսային կարգավորման մասին» օրենքում նախատեսված փոփոխություններին և լրացումներին, որոնք թույլ կտան հայրենադարձներին առանց տուրքի բերել իրենց ունեցվածքը։
Ավելի վաղ գործող օրենսդրության համաձայն, հայրենադարձն այդ արտոնությունը ստանալու համար վերջին հինգ տարվա ընթացքում ամեն տարի պետք է երկրից բացակայեր 180 և ավել օր։
Ընդունված փոփոխությունների համաձայն, պահանջվում է, որպեսզի արտերկրում գտնվելու ընդհանուր ժամանակահատվածը կազմի 915 օր 5 տարվա ընթացքում` առանց տարիների բաժանման։
Загружается новость ... "Лево"
Միաժամանակ արտոնություններն այս պահին տարածվում են միայն այն հայրենակիցների վրա, որոնք ՀՀ քաղաքացիներ չեն։ Իսկ եթե մարդն ունի ՀՀ քաղաքացիություն, ապա անկախ արտերկրում գտնվելու ժամկետներից` արտոնությունը նրա վրա չի տարածվում։
Ներկրվող ունեցվածքի ծավալների հարցով նշված է, որ կարելի է առանց տուրքի բերել կենցաղային և անձնական ունեցվածք` յուրաքանչյուր տեսակից երեքական միավոր։ Միաժամանակ, յուրաքանչյուր հայրենադարձի թույլատրվում է ներկրել միայն մեկ մեքենա։
Ընդ որում այդ մեքենան պետք է լինի հայրենադարձի սեփականությունն առնվազն կես տարի, որպեսզի արտոնյալ մաքսային ռեժիմը տարածվի նրա վրա։
Բացի այդ, համապատասխան կարգավիճակ ստանալուց հետո մարդուն տրամադրվում է 18 ամիս, որպեսզի նա իր ունեցվածքը տեղափոխի Հայաստան։–0–