Հինգշաբթի` հոկտեմբերի 24–ի առավել ուշագրավ նորությունները

ԵՐԵՎԱՆ, 25 հոկտեմբերի. /Նովոստի–Արմենիա/. «Նովոստի–Արմենիա» գործակալությունը ներկայացնում է հինգշաբթի` հոկտեմբերի 24–ի առավել ուշագրավ նորությունների իր տարբերակը։

• ԱԺ աշխատակազմի ղեկավարի նախկին տեղակալ Արսեն Բաբայանը, դատարանի որոշմամբ, երկու ամսով կալանավորվեց։

Այս մասին լրագրողներին տեղեկացրեց Բաբայանի փաստաբան Լուսինե Սահակյանը։

Միաժամանակ փաստաբանի խոսքով, ձերբակալումը ճանաչվեց ոչ իրավաչափ։

• ԵԱՀԿ-ի գործող նախագահի միջնորդությամբ Բրատիսլավայում մոտ ժամանակներս կանցնի Հայաստանի և Ադրբեջանի արտգործնախարարների հանդիպումը, որի ընթացքում կողմերը քննարկելու են ղարաբաղյան հակամարտության կարգավորման հեռանկարները: Այս մասին «Ամերիկայի Ձայն»-ին ասել է ԵԱՀԿ-ի գործող նախագահ, Սլովակիայի արտգործնախարար Միրոսլավ Լայչակը

• Ծերանոցներն ու մանկատները չեն փակվի, ծրագրվում է փոխել դրանց աշխատանքի ձևաչափը, հինգշաբթի կառավարության նիստում ասաց Հայաստանի աշխատանքի և սոցիալական հարցերի նախարար Զարուհի Բաթոյանը:

Հայաստանի կառավարությունը հինգշաբթի հաստատել է երեխաների, տարեցների և հաշմանդամների խնամքի ծառայությունների մատուցման պետհավաստագրի ձևաչափը:

• Երևանի ընդհանուր իրավասության դատարանը դատավոր Արտուշ Գաբրիելյանի նախագահությամբ հինգշաբթի բավարարել է Հատուկ քննչական ծառայության միջնորդությունը և երկու ամսով երկարացրել է ֆինանսների նախկին նախարար, ՊԵԿ նախկին ղեկավար Գագիկ Խաչատրյանի կալանքի ժամկետը։

• Հայաստանի Ազգային ժողովի նախկին խոսնակ Արա Բաբլոյանը հինգշաբթի հրավիրվել է հարցաքննության Հատուկ քննչական ծառայություն։

Դուրս գալով ՀՔԾ–ի շենքից և պատասխանելով այն հարցին, թե ինչպես է անցել զրույցը, Բաբլոյանը նշեց, որ «շատ դրական միջավայրում»։

Նա միաժամանակ ընդգծեց, որ շարունակում է պնդել, որ որևէ խախտում չի կատարել։ -0-