ԵՐԵՎԱՆ, 17 նոյեմբերի. /Նովոստի Արմենիա/. ՀՀ առաջնագծի զորամասերի ՀՕՊ համակարգերը համալրվել են «Իգլա-Ս» կամ «Իգլա-Սուպեր» նոր սերնդի դյուրակիր զենիթահրթիռային համալիրներով։
Ինչպես հայտնում է
hayzinvor.am–ը, առաջնագծի առաջին շարակարգի գումարտակներն արդեն համալրված են այս զինատեսակով:
ՀՀ ԶՈՒ ՀՕՊ զորքերի պետի տեղակալ-վարչության պետի տեղակալ, գնդապետ Արթուր Պողոսյանը հայտնել է, որ «Իգլա-Ս» դյուրակիր զենիթահրթիռային համալիրների ձեռք բերված խմբաքանակը մեծ է և ապահովում է կրակի բավականին մեծ խտություն:
««Իգլա-Ս»-ը լավագույնն է իր դասի մեջ: Այն տարբերակում է զանազան տիպի խանգարումները, մարտագլխիկը բավականին զգայուն է և կարող է հայտնաբերել նաև փոքր ջերմության աղբյուր հանդիսացող անօդաչու թռչող սարքերը»,– ասել է նա։
Загружается новость ...
"Право"
Գնդապետի խոսքով, «Իգլա-Ս»-ն օժտված է հրթիռի մեծ հեռահարությամբ և թիրախի խոցման մեծ հեռավորությամբ: Զգալի է նաև հրթիռի մարտական մասի զանգվածը, ինչի շնորհիվ բարձր է թիրախի ամբողջական ոչնչացման հավանականությունը:
«Մեր ձեռք բերած «Իգլա-Ս» համալիրները նոր են, և երկար տարիներ որևէ խնդիր չենք ունենա: «Իգլա-Ս» համալիրների մեր ջոկերը ապահովված են շարժական հնարավորություններով` մեքենաներով, հետախուզության, կապի առանձին միջոցներով»,– ավելացրել է նա։
Աղբյուրը նշում է, որ «Իգլա-Ս»-ն կարող է օգտագործել ընդամենը մեկ զինվոր, սակայն նա պետք է հատուկ պատրաստություն անցնի: Զորակոչի ընթացքում հավաքակայանում ընտրում են զենիթային ապագա հրաձիգներին՝ ուսումնական կենտրոնում հատուկ վերապատրաստման համար. «Կարևորում ենք զորակոչիկի կրթական մակարդակը, հոգեբանական եւ ֆիզիկական դիմացկունությունը: Այս զենքը ենթադրում է ակնթարթային մարտ, ուստի զենիթային հրաձիգը պետք է լավ պատրաստված լինի, արագ կողմնորոշվի: Նա մարտական ուսումնական փորձ ձեռք բերելուց հետո է միայն ստանձնում հերթապահությունը»,- շեշտել է Պողոսյանը:
Այս համալրմանը զուգահեռ առաջնագծի մի շարք զորամասեր հագեցվել են հայկական արտադրության վարժասարքով, որը ստեղծում է իրական օդային իրավիճակ, առաջադրում է խնդիրներ և հնարավորություն է ընձեռում զինվորին կատարելագործելու մարտ վարելու կարողությունները:
Զինված ուժերում «Իգլա» համալիրից չեն հրաժարվել: «Մենք կհրաժարվենք աստիճանաբար, երբ մեր ամբողջ պահանջարկը լրացվի «Իգլա-Ս» և «Վերբա» տիպի համալիրներով»,- նշել է գնդապետ Պողոսյանը և ընդգծել, որ միայն «Իգլա-Ս» համալիրները, բնականաբար, հակաօդային պաշտպանության համար բավարար չեն։
«Այս զենքը կրում է հակառակորդի օդուժի դեմ պայքարի առաջամարտիկի պարտավորությունը: Սակայն զինատեսակի հետ համատեղ հերթապահություն են իրականացնում մեր զենիթահրետանային համալիրները, երկրորդ շարակարգում՝ «Օսա-ԱԿ» մարտական մեքենաները, այնուհետև` «Ս-125», «Կուբ» համակարգերը, եւ վերջապես հակաօդային պաշտպանության տիտանը՝ «Ս-300» զենիթահրթիռային համալիրը: Այսինքն, հանրապետության օդային սահմանները վերահսկվում են ըստ բարձրությունների և ըստ հեռավորությունների շարակարգված ՀՕՊ համակարգերով»,– ավելացրել է գնդապետը։
ՀՕՊ զորքերը սպասում են համալրման, նոր պայմանագրեր կան տարբեր երկրների հետ: «Շատ շուտով հակաօդային պաշտպանության մեր զինանոցը կհամալրվի գերժամանակակից, ավտոմատացված, ավելի հզոր, ավելի մեծ հնարավորություններով օժտված տեխնիկայով: Այդ զինատեսակը կիրառելի է օդային նշանակետերի ամբողջ սպեկտորի, այդ թվում` գերճշգրիտ զենքերի դեմ»,- հայտնել է Պողոսյանը:
Գնդապետը հիշեցրել է, որ ՀՕՊ վարչությունում ՀՀ նախագահի հանձնարարականով այժմ մշակվում է զարգացման յոթնամյա ծրագիր: Արդյունքում, կատարելով նախագահի պահանջը, Հայաստանը կունենա հուսալի հակաօդային պաշտպանություն: -0-