Հետախուզվում են Նորաշենի համայնքի ղեկավարի ուղղությամբ կրակողները (ԼՈՒՍԱՆԿԱՐ)

ԵՐԵՎԱՆ, 10 մայիսի. /Նովոստի–Արմենիա/. Միջազգային հետախուզում է հայտարարվել չորս անձանց նկատմամբ, ովքեր կասկածվում են առանձնապես ծանր հանցագործություն կատարելու մեջ, հայտնում է Ոստիկանության մամուլի ծառայությունը։

Մայիսի 3-ին, ժամը 18.40-ի սահմաններում, Արտաշատ քաղաքից Վերին Արտաշատ գյուղ տանող ճանապարհին, անհայտ անձինք «Լադա Պրիորա» ավտոմեքենայով փակել են Նորաշենի համայնքապետարանի վարորդ Կարեն Ղազարյանի վարած «ՎԱԶ 2107» ավտոմեքենայի ճանապարհը և կրակահերթ արձակել նրա և ուղևորի՝ Նորաշենի համայնքի ղեկավար Նորայր Գրիգորյանի ուղղությամբ:

Կարեն Ղազարյանը վնասվածքներով տեղափոխվել է հիվանդանոց:

Կրակողները դեպքի վայրից դիմել են փախուստի:


«Ձեռնարկված համալիր օպերատիվ-հետախուզական և քննչական միջոցառումների շնորհիվ հանցագործությունը բացահայտվել է և միջազգային հետախուզում է հայտարարվել 1978 թ. ծնված Ռոլանդ Գալուստովի, 1994 թ. ծնված Ռոբերտ Գալստյանի, 1989 թ. ծնված Արթուր Նազարյանի և 1989 թ. ծնված Դերենիկ Սիմոնյանի նկատմամբ»,– ասվում է հաղորդման մեջ։

Դեպքի հանգամանքները ճշտվում են:

Միջոցառումներ են ձեռնարկվում հիշյալ անձանց և հանցագործության գործիք հրազենը հայտնաբերելու ուղղությամբ:

Քննությունը շարունակվում է: -0-