Հայտնի են դարձել Հայաստանի բնակիչների սեռական խանգարումների պատճառները

ԵՐԵՎԱՆ, 13 մայիսի. /Նովոստի–Արմենիա/. Հայաստանում սեռական խանգարումների պատճառը հիմնականում կապված է առողջական խնդիրների, ինչպես նաև վնասակար սովորությունների հետ, ասել է Հայաստանի պետական բժշկական համալսարանի սեքսապաթոլոգիայի ամբիոնի վարիչ, Սեքսապաթոլոգիայի համալսարանական կլինիկայի տնօրեն Սևադա Հակոբյանը։

«Շաքարային դիաբետը, սիրտ–անոթային հիվանդությունները, զարկերակային հիպերթենզիան և քրոնիկ բորբոքային հիվանդությունները, ավելորդ քաշը, հիպոկինեզիան, ծխելը, ալկոհոլի և թմրանյութերի օգտագործումը կարող են դառնալ սեռական խանգարումների պատճառ»,– չորեքշաբթի լրագրողներին ասաց Հակոբյանը։

Նա նշել է, որ հիվանդությունների առաջին ախտանիշները կարող են հայտնվել հենց սեռական խանգարումների տեսքով։ Սեքսապաթոլոգն առանձնացրել է նաև օրգանական և անօրգանական գործոններ, որոնք հանգեցնում սեռական խանգարումների։

«Օրգանականներին են պատկանում անոթների և նյարդային համակարգի խնդիրների հանգեցնող գործոնները, իսկ անօրգանականներին` զույգի միջանձնային խնդիրները, օրգանիզմի ֆիզիոլոգիական խախտումները»,– ընդգծել է Հակոբյանը։

Նրա խոսքով, Հայաստանում տղամարդկանց մոտ սեռական ամենատարածված խանգարումներն էրեկցիայի խնդիրներն ու վաղաժամ սերմնաժայթքումն է, կանանց մոտ` օրգազմի բացակայությունը, սեռական ցանկության նվազումը կամ բացակայությունը, վագինիզմը։

«Հայաստանում սեքսապաթոլոգին են դիմում սեռական ակտիվ կյանք վարող միջին տարիքի տղամարդիկ»,– ասել է Հակոբյանը։

Նա հիշեցրել է նաև, որ խնդիր հայտնաբերելու դեպքում բուժում պետք է անցնեն երկու զուգընկերներն էլ։

Ավելի վաղ նա հայտնել է, որ մինչև 45 տարեկանում Հայաստանում սեռական խանգարումներից տառապում է տղամարդկանց 18-23 տոկոսը, սակայն 45-70 տարիքային կատեգորիայի համար այդ ցուցանիշը կտրուկ աճում է` մինչև 52 տոկոս։ -0-