Հայտնի է դարձել «Կոնվերս բանկ»–ից հափշտակված գումարի չափը. ՄԱՆՐԱՄԱՍՆԵՐ

ԵՐԵՎԱՆ. 9 հոկտեմբերի. /Նովոստի Արմենիա/. Երկուշաբթի թալանել են «Կոնվերս բանկի» «Սայաթ–Նովա» մասնաճյուղը։

Հարուցվել է քրեական գործ՝ բանկի մասնաճյուղի կառավարչի նկատմամբ ավազակային հարձակում կատարելու դեպքի առթիվ, հայտնում է Հայաստանի քննչական կոմիտեի մամուլի ծառայությունը։

Առավոտյան հաղորդում է ստացվել, որ Երևան քաղաքի Սայաթ-Նովա պողոտայում գործող «Կոնվերս բանկ» ՓԲ ընկերության «Սայաթ-Նովա» մասնաճյուղից հափշտակվել է առանձնապես խոշոր չափերով գումար:

Նախնական տվյալներով՝ ենթադրյալ հանցագործություն կատարած անձը հոկտեմբերի 9-ին՝ ժամը 11:00-ի սահմաններում, բանկի մասնաճյուղի կառավարչի կյանքի համար վտանգավոր բռնություն գործադրելու, այն է՝ մասնաճյուղում պայթյուն իրականացնելու սպառնալիքով, վերջինիցս պահանջել և հափշտակել է առանձնապես խոշոր չափերի գումար։


Նախնական հաշվարկներով, հափշտակվել է տարբեր արժույթների մոտ 95.750.000 դրամին համարժեք (շուրջ 200 հազար դոլար) կանխիկ գումար:

Դեպքի առթիվ ՀՀ ՔԿ ԵՔՔՎ Կենտրոն և Նորք-Մարաշ վարչական շրջանների քննչական բաժնում հարուցվել է քրեական գործ՝ ՀՀ քրեական օրենսգրքի 175-րդ հոդվածի 3-րդ մասի 1-ին կետի (Ավազակությունը, որը կատարվել էառանձնապես խոշոր չափերով գույք հափշտակելու նպատակով) հատկանիշներով:

«Ձեռնարկվում են անհրաժեշտ քննչական և օպերատիվ-որոնողական միջոցառումներ դեպքի հանգամանքները պարզելու, ենթադրյալ հանցագործություն կատարած անձին հայտնաբերելու ուղղությամբ»,– ասվում է հաղորդագրության մեջ։

Կատարվել է դեպքի վայրի զննություն, առգրավումներ։

Ինչպես նշում են կոմիտեից, քննության շահերից ելնելով, այլ մանրամասներ քննության այս փուլում հրապարակման ենթակա չեն։ -0-