ԵՐԵՎԱՆ, 19 սեպտեմբերի. /Նովոստի-Արմենիա/. Հայաստանի պետական եկամուտների կոմիտեն խախտումներ է հայտնաբերել «Հավիցա» ՍՊԸ գործունեությունում, հայտնում է գերատեսչության մամուլի ծառայությունը։
Պարզվել է, մասնավորապես, որ ընկերությունը, օգտագործելով ԵՏՄ–ից ներկրումների պարզված ընթացակարգերը, ներմուծել է մեծ քանակությամբ հավկիթ և տեղականի անվան տակ փորձել է դրանք իրացնել շուկայականից անհամեմատ ցածր գներով` անարդար մրցակցային միջավայր ձևավորելով տեղական արտադրության ոլորտում։
Ընկերությունը հարկային մարմիններին կեղծ տեղեկություններ է տրամադրել հավկիթի իրացման գնի վերաբերյալ, որը պաստացի վաճառել է հանրապետության տարբեր մարզերում առանց հարկային հաշիվների դուրսգրման, ընդհանրապես առանց նշագրման կամ կեղծ նշագրմամբ։
Այսպիսով, 2016 թվականի օգոստոս–սեպտեմբերին ընկերությունը Ռուսաստանից Հայաստան է ներկրել 1 902 000 հատ հավկիթ, ինչպես նաև 39 990 կգ թռչնամիս և 269 450 կգ ցորեն։ Ներկրված ապրանքները պահեստավորվել են Արմավիրի մարզի Մյասնիկյան գյուղում գտնվող թռչնաբուծական ֆաբրիկայի տարածքում, մինչդեռ ՊԵԿ աշխատակիցներն ընկերության պահեստում օգոստոսի 25–ին հավկիթի և ցորենի մնացորդ չեն հայտնաբերել։
ՊԵԿ–ի տեղեկատվական բազայում առկա տեղեկություններով, պարզվել է, որ օգոստոսի 26–ից ընկերությունը դուրս է գրել հաշիվներ «Նոր Զովք» ՍՊԸ–ի անվամբ, համաձայն որոնց, մեկ իրացված հավկիթի գինը կազմել է 27 դրամ` ներառյալ ԱԱՀ–ն։ ՊԵԿ–ի կողմից իրականացված գործողությունների արդյունքում ներմուծված խմբաքանակի մնացած մասն ընկերությունն արդեն սկսել է իրացնել 46 դրամով` ներառյալ ԱԱՀ–ն։
Պարզվել է նաև, որ «Նոր Զովքին» մատակարարած հավկիթները նշագրված են եղել «ԳԹՖ» նշագրումով` որպես «Գնդեվազի թռչնաֆաբրիկա» ՓԲԸ–ի արտադրանք։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում