Հայաստանյան ամառը շարունակվում է, բայց աշունը սարերի ետևում չէ. օդերևութաբան

ԵՐԵՎԱՆ, 4 հոկտեմբերի. /Նովոստի–Արմենիա/. Հայաստանի միջին ամսական ջերմաստիճանը հոկտեմբերին կլինի նորմերի սահմաններում, տեղումների մակարդակը` նորմից ցածր, երեքշաբթի լրագրողներին հայտնեց Հայհիդրոմետկենտրոնի օպերատիվ հիդրոմեթեորոլոգիայի ղեկավար Զարուհի Պետրոսյանը։

«Առաջիկա հինգ օրերին սպասվում է առանց տեղումների եղանակ և բավականին բարձր ջերմաստիճանային ֆոն։ Արարատյան դաշտավայրում օդը կտաքանա մինչև 28-29 աստիճան, հոկտեմբերի 4–ից սպասվում է ջերմաստիճանի բարձրացում 2-3 աստիճանով։ Հայաստանի ողջ տարածքում օդի միջին ջերմաստիճանը կլինի նորմից բարձր»,– հայտնեց Պետրոսյանը։

Ըստ նրա, օդի միջին ջերմաստիճանը հանրապետությունում մինչև հոկտեմբերի 15–ը սպասվում է նորմի սահմաններում` 15 աստիճան տաքություն, այսինքն, առաջիկա շաբաթվա ընթացքում ամառը դեռ կպահպանվի։

«Հույս ունենք, որ առանց տեղումների եղանակը չի հանգեցնի բացասական հետևանքների, քանի որ սեպտեմբերին տեղումները բավականին շատ են։ Սեպտեմբերի վերջին և հոկտեմբերի առաջին օրերին լեռնային շրջաններում արդեն ցրտահարություններ են գրանցվել, այսօր Ծաղկահովիտ և Աշոցք գյուղերում գրանցվել են բացասական ջերմաստիճաններ` մինուս երկու աստիճան։ Հովիտներում ցրտահարությունները հնարավոր են ամսվա վերջին տասնօրյակում»,– ասաց Պետրոսյանը։

Հայաստանում աշնան անցումը, Պետրոսյանի խոսքով, սպասվում է հոկտեմբերի կեսերից։

Արարատյան դաշտավայրում, Արմավիրի մարզում, Արագածի նախալեռներում օդի միջին ջերմաստիճանը հոկտեմբերի երկրորդ կեսին կլինի 12-14 աստիճանի սահմաններում, Շիրակի, Գեղարքունիքի, Կոտայսի մարզերում, ինչպես նաև Արագածոտնի մարզի լեռնային շրջաններում` 6-8 աստիճան, Լոռու մարզում` 10 աստիճան, Տավուշի մարզում` 12-13 աստիճան, Վայոց Ձորում` 14 աստիճան, Սյունիքում` 13-15 աստիճան։

Օդի ջերմաստիճանը մայրաքաղաքում կլինի 13 աստիճան։

«Հայաստանում հոկտեմբերը շատ հաճելի ամիս է, և այս տարի էլ բացառություն չի լինի։ Ըստ վիճակագրության, Հայաստանում ավելի շատ են ջերմ հոկտեմբերները, քան սառները։ Օրինակ, 2002, 2007 և 2010 թվականներին հոկտեմբերին օդի ջերմաստիճանը նորմայից բարձր է եղել 3-4 աստիճանով»,– ասաց Պետրոսյանը։ -0-