Ծնողներ, զգուշացեք. Հայաստանում վաճառվող խաղալիքները թունավոր նյութեր են պարունակում

ԵՐԵՎԱՆ, 1 հունիսի. /Նովոստի-Արմենիա/. Greenpeace–ը հայտնաբերել է, որ Հայաստանում և Մաքսային միության այլ երկրներում վաճառվող խաղալիքներում առողջության համար վտանգավոր նյութեր կան։

Այդ մասին հայտնում է Rambler.ru–ն` հղում անելով Երեխաների պաշտպանության օրը բնապահպանական կազմակերպության հրապարակած հետազոտությանը։

Greenpeace–ը հրապարակել է խաղալիքների փորձաքննության արդյունքները։ Փորձաքննությունն անցկացվել է` պարզելու համար դրանցում ամենատարածված ինը տեսակի ֆտալատների առկայությունը։ Այդ թունավոր նյութերը հայտմաբերվել են բոլոր 16 նմուշներում, ընդ որում` դրանցից վեցում եվրոպական նորմերը 200-300 անգամ գերազանցող չափով։

Բնապահպանները հիմնականում ստուգել են կենդանիների ֆիգուրներ, Ռուսաստանում և Չինաստանում արտադրված տիկնիկներ և մեքենաներ։ Խաղալիքների կեսը պարունակում էր Մաքսային միությունում արգելված դիբուտիֆտալատ, ընդ որում` շատ բարձր խտությամբ։ «Հատկանշական է, որ երեք տեսակի ֆտալատ է հայտնաբերվել Մոսկվայում գնված «Պեպպա Խոզուկ» (Չինաստան) խաղալիքում, որը վրա մակնշված էր. «չի պարունակում ֆտալատ»»,– նշում են բնապահպանները։


Այս կապակցությամբ Greenpeace–ը և Ռուսաստանի, Բելառուսի, Ղազախստանի, Հայաստանի և Ղրղըզստանի հասարակական կազմակերպությունները սկսել են «Ազնիվ խաղալիքներ» արշավը, որի նպատակն է խաղալիքներն անվտանգ դարձնել առողջության և շրջակա միջավայրի համար։ Ապացուցված է, որ ֆտալատները կարող են առաջացնել էնդոկրին համակարգի խանգարումներ և հանգեցնել ճարպակալման, շաքարախտի, անպտղության և նույնիսկ քաղցկեղի։ Հատկապես դրանց նկատմամբ զգայուն են փոքրիկները։ -0-