Հայաստանում տեղեկատվական տեխնոլոգիաների ոլորտի աճը կազմել է 17 տոկոս

ԵՐԵՎԱՆ, 3 փետրվարի. /Նովոստի–Արմենիա/. Հայաստանում տեղեկատվական տեխնոլոգիաների ոլորտի աճը կազմել է 17 տոկոս, չորեքշաբթի լրագրողներին ասաց Հայաստանի էկոնոմիկայի նախարար Կարեն Ճշմարիտյանը։

«Տարին ՏՏ–ի համար հաջող էր։ Այդ բնագավառում գործում է ավելի քան 450 ընկերություն և աշխատում է մոտ 13 հազար մասնագետ։ Ոլորտի ընդհանուր շրջանառությունը կազմում է 550 մլն դոլար»,– ասաց նախարարը։

Ըստ նրա, 2015 թվականին «Տեղեկատվական տեխնոլոգիաների ոլորտի պետական օժանդակության մասին» օրենքի` ուժի մտնելուց հետո, որը նախատեսում էր շահութահարկի զրոյական տոոկսադրույքը և 10–տոկոսանոց եկամտահարկ հավաստագրված ստարտափ ընկերությունների համար, ստեղծվել է 79 նոր կազմակերպություն 329 աշխատողներով։

Հարկային արտոնություններ նախատեսող հավաստագրեր են ստացել 64 սկսնակ ընկերություններ, որտեղ աշխատում է 283 մարդ։

Եկամտահարկի տոկոսադրույքը պրոգրեսիվ սանդղակով սկսվում է 24 տոկոսից։

Ճշմարիտյանի խոսքով, ՏՏ ոլորտում առկա են միջազգային գործակցության լավ նախադրյալներ։ Փոխգործակցության նոր ուղղությունը, ըստ նախարարի, Իրանն է։ Մասնավորապես, հայկական ընկերություններն ավանդական Digitec Expo տեխնոլոգիական ցուցահանդեսի շրջանակում առաջարկում են եռակողմ գործակցության ձևաչափ հաստատել Հայաստանի, Իրանի և ԱՄՆ–ի միջև։ -0-