Հայաստանում հակածխախոտային օրենքը կհասնի նարգիլեներին և վեյփերին

ԵՐԵՎԱՆ, 10 օգոստոսի. /Նովոստի–Արմենիա/. Հայաստանի հասարակական վայրերում ծխելն արգելող օրինագծի դրույթներում կլինեն կետեր, որոնք վերաբերում են նարգիլեներին և էլեկտրոնային ծխախոտին, «Նովոստի–Արմենիա» գործակալությանն ասաց Հայաստանի առողջապահության ազգային ինստիտուտի տնօրեն Ալեքսանդր Բազարչյանը։

2017 թվականի մայիսին Հայաստանի առողջապահության նախարարությունը կառավարության դիտարկմանը ներկայացրեց ծխելու դեմ պայքարի ռազմավարական ծրագիրը, որը նախատեսում է չորս բաղադրիչ` օրենսդրական, միջազգային, գովազդային–հոգեբանական և առողջապահական, որի շրջանակում նախատեսվում է հասարակական բոլոր փակ վայրերում ծխելն արգելող օրենսդրության մշակումը։


«Օրինագիծը, որն այս պահին գտնվում է մշակման փուլում, վերաբերում է ծխախոտի բոլոր տեսակներին։ Այս իմաստով զանազան սահմանափակումներ կսահմանվեն նաև հասարակական վայրերում նարգիլեի և էլեկտրոնային ծխախոտի օգտագործման նկատմամբ»,– ասաց Բազարչյանը։

Նրա խոսքով, առայժմ հստակ չի որոշվել, թե ինչ սահմանափակումներ են սահմանվելու։
«Նարգիլեն ծխախոտ պարունակող պրոդուկտ է։ Ինչ վերաբերում է էլեկտրոնային ծխախոտներին, ապա դրանք իրականում նիկոտինն օրգանիզմ հասցնող էլեկտրոնային համակարգեր են, հետևաբար մենք դրանց նկատմամբ կկիրառենք միջազգային օրենսդրությամբ, ինչպես նաև ԵՏՄ պարտավորությունների շրջանակում ամրագրված գործիքակազմ»,– ավելացրեց նա։

Ինչպես հայտնեց Բազարչյանը, օրինագիծը խորհրդարանի դիտարկմանը կներկայացվի այս տարվա աշնանը, իսկ սեպտեմբերին կսկսվեն ակտիվ քննարկումներ` փորձագետների և հանրային հատվածի մասնակցությամբ։

ԱՀԿ–ի տվյալների համաձայն, 2012 թվականին Հայաստանում ծխելը մեծահասակ բնակչության շրջանում կազմել է 25.4 տոկոս, որոնցից 50.9 տոկոսը` տղամարդիկ, 3.2 տոկոսը` կանայք։ Հաշվի առնելով մեծահասակ բնակչության շրջանում ծխողների ներկայիս մակարդակը` վաղաժամ մահվան թիվը կկազմի 195 հազար ներկայիս 591 հազար ծխողներից։ -0-