Հայաստանում անտանելի շոգ է սպասվում առաջիկա օրերին

ԵՐԵՎԱՆ, 12 օգոստոսի. /Նովոստի–Արմենիա/. Ջերմաստիճանային բարձր ֆոն և հրդեհավտանգ իրավիճակ է սպասվում Հայաստանում առաջիկա օրերին, նախազգուշացնում է Հայհիդրոմետկենտրոնը։

Ինչպես հայտնում է ԱԻն կայքը, օգոստոսի 12–ից 16–ը հանրապետության տարածքում անձրևներ չեն կանխատեսվում, օդի ջերմաստիճանն էապես չի փոխվի։ Օդերևութաբանները խորհուրդ են տալիս զերծ մնալ ֆիզիկական ակտիվությունից և արևի ուղիղ ճառագայթների տակ գտնվելուց։

Քամին կլինի հյուսիս–արևմտյան` 2-7 մետր վայրկյան արագությամբ։

Շիրակի, Կոտայքի, Գեղարքունիքի, Լոռու մարզերում, ինչպես նաև Արագածոտնի և Վայոց Ձորի լեռնային շրջաններում, Սյունիքի նախալեռներում սպասվում է 32-33 աստիճան տաքություն։

Իսկ Տավուշի, Արարատի, Արմավիրի մարզերում, Արագածոտնի և Վայոց Ձորի նախալեռներում, Սյունիքի հովիտներում սնդիկի սյունը կբարձրանա մինչև 38-40 աստիճան։ Արցախի տարածքում սպասվում է մինչև 37 աստիճան տաքություն։

Օդերևութաբանների կանխատեսումներով, Երևանում ցերեկային ժամերին առաջիկա հինգ օրերի ընթացքում օդի ջերմաստիճանը կբարձրանա մինչև 40 աստիճան։ -0-