Հայաստանի հնագիտական բացահայտումները կարող են փոխել Երկրի բնակեցման մասին ժամանակակից պատկերացումները

ԵՐԵՎԱՆ, 31 մարտի. /Նովոստի–Արմենիա/. Հայաստանի որոշ հնագիտական բացահայտումներ կարող են փոխել Երկիր մոլորակի բնակեցման հնագույն փուլերի մասին ժամանակակից գիտական պատկերացումները, հինգշաբթի հայտնեց Հայաստանի գիտությունների ազգային ակադեմիայի հնագիտության և ազգագրության ինստիտուտի տնօրեն Պավել Ավետիսյանը։

«Մենք ունենք այնպիսի տվյալներ, որոնք թույլ են տալիս փոխել պատմական վաղ փուլերում մոլորակի բնակեցման մասին գիտական պատկերացումները։ Օրինակ, Նոր Գեղիում քարի դարի` մ.թ.ա. 300-350 հազ. տարով թվագրվող պատմական հուշարձանի ուսումնասիրություններն են»,– նշեց նա։

Ավետիսյանի խոսքով, գիտության մեջ կարծիք կա, որ ժամանակակից մարդու նախնի Homo erectus–ը կամ Homo Sapiens–ը ձևավորվել է Աֆրիկայում և այնուհետև ցրվել մոլորակով մեկ։ Միաժամանակ, հայկական հուշարձանը վկայում է, որ այս տեսակետն այդքան էլ ճշգրիտ չէ, և կան տարածաշրջաններ, որտեղ հնագույն մարդու այդ տեսակը կարող էր լոկալ ձևավորում ունենալ։


Ավետիսյանն ընդգծեց, որ Նոր Գեղիի պատմական հուշարձանը հնագույն ժամանակներում մարդու «այլընտրանքային» տարածման հավանականության մասին վկայող առաջին պատմական հուշարձանն է։

«Այժմ դա ակտիվ քննարկվում է միջազգային գիտական շրջանակներում, և ուսումնասիրությունները հրապարակվել են «Science» հեղինակավոր ամսագրում»,– նշեց նա։


Բացի այդ, գիտնականի խոսքով, շատ հետաքրքիր նյութ են տալիս Արարատյան դաշտավայրի պեղումները, որոնք վերաբերում են վաղ հողագործության ժամանակաշրջանին։ Խոսքն Արաքս գետից դեպի հյուսիս ձգվող առաջին բնակավայրերի մասին է։

«Այդ հնագույն վայրերից 2015 թվականին մենք ուսումնասիրել և հետաքրքիր արդյունքներ ենք ստացել Ակնաշենում, որտեղ կան ամենահին բնակավայրի հետքեր»,– ասաց Ավետիսյանը։ -0-