ԵՐԵՎԱՆ, 30 ապրիլի. /Նովոստի-Արմենիա/. Հայաստանի նախագահ Արմեն Սարգսյանը պատրաստ է հրամանագիր ստորագրել վարչապետի պաշտոնի այն թեկնածուի նշանակման մասին, ում օգտին կքվեարկի երկրի խորհրդարանը:
Ինչպես հաղորդում է
ՏԱՍՍ-ը, այդ մասին նա հայտնել է Բելառուսի ազգային հեռուստաալիքին տված հարցազրույցում:
«Սահմանադրությունն ասում է, որ կա երկրի վարչապետի ընտրության միայն մեկ տարբերակ` քվեարկությունը խորհրդարանում: Նա, ով կընտրվի, սահմանադրության համաձայն, կդառնա վարչապետ, և ես նույն պահին կստորագրեմ համապատասխան հրամանագիրը»,- նշել է հայկական պետության ղեկավարը:
«Բոլորը պետք է հարգեն երկրի սահմանադրությունը, հակառակ դեպքում մենք կբացենք Պանդորայի արկղը: Եթե մեկ անգամ խախտենք սահմանադրությունը, ապա հետագայում էլ կխախտենք»,- ասել է Սարգսյանը: Նա ընդգծել է, որ «վարչապետին ընտրում են միայն խորհրդարանի ներսում` հաշվի առնելով գործող օրենսդրությունը, այլ ոչ թե հանրահավաքներում և ցույցերում»:
Ապրիլի 13–ից հանրապետությունում իրականացվող բողոքի մասշտաբային ակցիաների ֆոնին ապրիլի 23–ին ՀՀ վարչապետ Սերժ Սարգսյանը հայտարարեց իր հրաժարականի մասին։ Նույն օրը ՀՀ նախագահ Արմեն Սարգսյանն ընդունեց կառավարության հրաժարականը։ Ապրիլի 25–ին հանրահավաքի ժամանակ Նիկոլ Փաշինյանն առաջարկվեց որպես վարչապետի թեկնածու։
Ապրիլի 28–ին ՀՀ ԱԺ փոխխոսնակ, ՀՀԿ գործադիր մարմնի անդամ Էդուարդ Շարմազանովը հայտարարեց, որ ՀՀԿ–ն թեկնածու չի առաջադրի վարչապետի ընտրություններում։ Նույն օրը «Բարգավաճ Հայաստան» կուսակցության և «Ծառուկյան» խորհրդարանական դաշինքի առաջնորդ Գագիկ Ծառուկյանը հայտարարեց, որ «Ծառուկյան» դաշինքը կաջակցի ժողովրդի թեկնածուին վարչապետի ընտրություններում։ ՀՅԴ–ն ևս որոշում է ընդունել աջակցել Նիկոլ Փաշինյանի թեկնածությանը։–0–
