Հայ պատգամավորները նիստի օրակարգում չեն ներառել Արցախի ճանաչման հարցը

ԵՐԵՎԱՆ, 16 մայիսի. /Նովոստի-Արմենիա/. Հայ պատգամավորները երկուշաբթի նիստի օրակարգում չեն ներառել Ղարաբաղի անկախության ճանաչման հարցը:

Հայաստանի կառավարությունը մայիսի 5-ին քննարկել և Ազգային ժողով է ուղղել «Արցախի հանրապետության ճանաչման մասին» օրինագիծը: Օրինագծի հեղինակներն են` «Ժառանգություն» ընդդիմադիր խմբակցության ղեկավար Զարուհի Փոտանջյանը և ընդդիմադիր Հայ ազգային կոնգրեսի անդամ Հրանտ Բագրատյանը: ՀՀ ԱԳ փոխնախարար Շավարշ Քոչարյանը հայտարարել է, որ Երևանում օրինագիծը կքննարկվի «Ադրբեջանի նոր ագրեսիայի» դեպքում:

Քվերակությունից առաջ խորհրդարանական խմբակցությունների գրեթե բոլոր ներկայացուցիչները կողմ էին չքննարկել հարցը տվյալ փուլում և առաջարկել են ձեռնպահ մնալ քվեարկությունից: Արդյունքում, քվեարկությանը մասնակցել են միայն 12 պատգամավոր` ՀՅԴ «Դաշնակցություն», «Ժառանգություն» կուսակցություններից, մի քանի անկախ պատգամավորներ և օրինագծի հեղինակներից մեկը` Հրանտ Բագրատյանը:

Ապրիլի 2–ից 5–ն ադրբեջանական ԶՈՒ–ն ղարաբաղաադրբեջանական շփման գծի հարավային, հարավարևելյան և հյուսիսարևելյան ուղղություններով ձեռնարկել է բացահայտ հարձակվողական գործողություններ` հրետանիով, զրահապատ տրանսպորտային միջոցներով և ավիացիայով: ԼՂՀ պաշտպանության բանակը հաջողությամբ ճնշել է հակառակորդի գործողությունները` հասցնելով մեծ վնասներ։

Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։ 1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։

Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։

1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։

Զինադադարի ռեժիմի մասին համաձայնությունը պահպանվում է մինչ այժմ։ 1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։ -0-