ԵՐԵՎԱՆ, 2 ապրիլի. /Նովոստի–Արմենիա/.Ապրիլյան պատերազմը բանակի համար մեծ դաս ու փորձառություն էր հակառակորդի հավանական գործողություններին ու նոր սպառազինության կիրառմանը դիմագրավելու համար, ասել է ՀՀ զինված ուժերի գլխավոր շտաբի պետ Մովսես Հակոբյանը:
Ինչպես հայտնում է Հայաստանի ՊՆ մամուլի ծառայությունը, այսօր` ապրիլի 2-ին, ՀՀ պաշտպանության նախարար Վիգեն Սարգսյանը և ՀՀ զինված ուժերի գլխավոր շտաբի պետ, գեներալ-գնդապետ Մովսես Հակոբյանը, ԶՈՒ բարձրաստիճան սպայակազմի ուղեկցությամբ այցելել են «Եռաբլուր» զինվորական պանթեոն, հարգանքի տուրք մատուցել 2016 թ. ապրիլյան քառօրյա մարտական գործողությունների ընթացքում հերոսաբար զոհված զինծառայողների հիշատակին։
Պաշտպանության նախարարը և ԶՈՒ ԳՇ գլխավոր շտաբի պետը մասնակցել են զինված ուժերի հոգևոր առաջնորդ Վրթանես եպիսկոպոս Աբրահամյանի հանդիսապետությամբ անցկացված հոգեհանգստի կարգին, ծաղիկներ խոնարհել նաև սպարապետ Վազգեն Սարգսյանի, զորավար Անդրանիկ Օզանյանի շիրիմներին և Արցախյան ազատամարտի զոհերի հիշատակը հավերժացնող հուշակոթողին։
Այս երկու տարիների ընթացքում բավականին մեծ աշխատանք է կատարվել ապրիլյան գործողությունների ընթացքում ի հայտ եկած խնդիրների շտկման ուղղությամբ։ Հակառակորդն այլևս նմանատիպ ռազմական գործողություն ի վիճակի չի իրականացնել։ Չի նշանակում, որ դա բավարար է, բանակն ու պատերազմն այնպիսի երևույթներ են, որ անդադար նոր մեթոդներ են փնտրում հակառակորդի հանդեպ գերակայություն ձեռք բերելու համար, և մենք աշխատանքներ ենք իրականացնում նաև այդ ուղղությամբ», - ասել է Մովսես Հակոբյանը:
Պաշտպանության նախարարը բանակաշինությունը համեմատել է պետականաշինության գործընթացի հետ։ «Որքան էլ ապրիլյան դեպքերը ցավալի ու ողբերգական հետևանքներ ունեցան մեր հայրենակիցների կորստի առումով, երկիրը պաշտպանելու այլ ձև աշխարհի որևէ երկրի բանակ դեռևս ի հայտ չի բերել»,- ասել է Վիգեն Սարգսյանը:
Նրա խոսքով, զինվորական ծառայությունը միշտ էլ կապված է վտանգի, զոհողության, կյանքի գնով անգամ երկիրը պաշտպանելու գաղափարի հետ:
«Կարծում եմ, մենք հասկացել ենք, որ երկրի պաշտպանությունը ողջ երկրի, պետական համակարգի, հասարակության կենսակերպ է, և կարծում եմ, որ դա է մեր հետագա քայլերի առանցքը, բոլոր այն ծրագրերի ու նպատակների, որոնք պետք է կյանքի կոչենք, որպեսզի որպես «Ազգ-բանակ» պատրաստ լինենք պաշտպանելու մեր երկիրն ու պետությունը, մեր քաղաքակրթությունը, այն հսկայական ժառանգությունը, որը, որպես ժողովուրդ, ունենք հազարամյակների ընթացքում»,- ընդգծել է Սարգսյանը:
Նա ավելացրել է, որ հետևողական աշխատանք է տարվելու Հայաստանի մարտունակությունը բարձրացնելու ուղղությամբ, հայկական բանակի համբավը այն մակարդակի վրա պահելու համար, որով երկիրը դուրս է եկել ղարաբաղյան պատերազմից: -0-
