Հակակոռուպցիոն դատարանը մերժել է Վահան Քերոբյանին կալանավորելու միջնորդությունը
ԵՐԵՎԱՆ, 8 նոյեմբեր․/Նովոստի-Արմենիա/. ՀՀ էկոնոմիկայի նախկին նախարար Վահան Քերոբյանը Facebook-ի իր էջում հայտնել է, որ Հակակոռուպցիոն դատարանը մերժել է իրեն կալանավորելու միջնորդությունը:
«Ինձ հետ ամեն ինչ լավ է, հակակոռուպցիոն դատարանը մերժեց ոչ միայն ինձ, այլև հինգ տարի քննվող և ավելի քան տաս տարվա վաղեմության դեպքերին վերաբերող գործով անցնող կարծես թե մյուս բոլոր մեկ տասնյակից ավելի մեղադրյալներին կալանավորելու միջնորդությունները»,-հայտնել է նա սոցցանցի իր էջում՝ ընդգծելով, որ մեղադրանքը չի ընդունում։
Վահան Քերոբյանի քրեական գործի մասին
Նոյեմբերի 7-ին ձերբակալվել է էկոնոմիկայի նախկին նախարար Վահան Քերոբյանը: Այս մասին հայտնել են հայկական լրատվամիջոցները՝ նշելով նաև, որ Քերոբյանի ձերբակալությունը կապված է առանձնապես խոշոր չափերով փողերի լվացման հետ:
Ավելի ուշ Քննչական կոմիտեն տարածեց հաղորդագրություն՝ նշելով, որ հանցավոր կազմակերպության անդամները 2008-2014 թվականներին հափշտակել են Երևան համայնքին պատկանող շուրջ 73.8 հա մակերեսով հողատարածքները, կատարել առանձնապես խոշոր չափերով փողերի լվացում։
Նախաձեռնված քրվարույթի շրջանակում 7 անձ ձերբակալվել է, որոնցից մեկը Վահան Քերոբյանն էր։
Այնուհետև ՔԿ-ն հայտնել է, որ հանցավոր կազմակերպության անդամների կողմից 2008-2014 թվականներին Երևան համայնքին պատկանող շուրջ 73.8 հա մակերեսով հողատարածքները հափշտակելու, առանձնապես խոշոր չափերով փողերի լվացում կատարելու վերաբերյալ նախաձեռնված քրեական վարույթի նախաքննության ընթացքում ձերբակալվել է 9 անձ։ Վերջիններիս նկատմամբ կալանքը որպես խափանման միջոց կիրառելու վերաբերյալ միջնորդություն է ներկայացվել դատարան։
Քերոբյանի փաստաբան Տիգրան Եղոյանը հայտարարել էր, որ իր պաշտպանյալը չի ճանաչում մեղքը։ Փաստաբանի հաղորդմամբ, Քերոբյանին կալանավորելու միջնորդություն է ներկայացվել։
Հիշեցնենք, որ Քերոբյանը անցնում է նաև մեկ այլ գործով, մեղադրվում նախարար աշխատած տարիներին պաշտոնեական լիազորությունները չարաշահելու համար:
Նշենք նաև, որ Վահան Քերոբյանը զբաղեցրել է էկոնոմիկայի նախարարի պաշտոնը 2021–2024թթ․–ին։
