Հայտնի են գործարարները, ովքեր վճարել են Քոչարյանի 2 մլրդ դրամ գրավը

ԵՐԵՎԱՆ, 20 հունիսի./Նովոստի-Արմենիա/. ՀՀ երկրորդ նախագահ Ռոբերտ Քոչարյանի՝ կալանքից ազատ արձակման դիմաց 2 մլրդ դրամ գրավը տվել են ռուս գործարարները: Այս մասին հաղորդում է ՌԲԿ-ն՝ հղում անելով նախկին նախագահին մոտ կանգնած աղբյուրներին:

Նախկին նախագահի ներկայացուցիչ Վիկտոր Սողոմոնյանը ՌԲԿ-ի հետ զրույցում հաստատել է այդ տեղեկությունը:

Նրա խոսքով, գրավը վճարել են Սամվել Կարապետյանը («Տաշիր» ընկերությունների խումբ), Սերգեյ Համբարձումյանը («Մոնարխ» ընկերությունների խումբ), Գենադի Ստեփանյանը (Ռուս գործարար և մեցենատ): Իսկ մնացած գումարը տրամադրել է «Սիստեմա» ֆինանսական բաժնետիրական կորպորացիան, որտեղ Քոչարյանը անկախ տնօրեն է հանդիսանում:

Քոչարյանը «Սիստեմայի» տնօրենների խորհրդի կազմում է 2009թ.-ից: Ընկերության ներկայացուցիչ Սերգեյ Կոպիտովը ՌԲԿ-ի հետ զրույցում հաստատել է, որ կորպորացիան որոշել է մասնակցել գրավի վճարմանը, որը սահմանվել է Հայաստանի դատական իշխանության մարմինների կողմից կորպորացիայի անկախ տնօրեն Ռոբերտ Քոչարյանի նկատմամբ: Սողոմոնյանը նշել է, որ գումարը չի վճարվել «Սիստեմա» ֆինանսական բաժնետիրական կորպորացիայի հիմնական բաժնետեր Վլադիմիր Եվտուշենկովի կողմից անձամբ, այլ գրավը վճարել է ընկերությունը՝ որպես իրավաբանական անձ:

ՌԲԿ-ն հարցում է ուղարկել «Տաշիր»-ի մամուլի ծառայություն և մեկնաբանության համար դիմել Գենադի Ստեփանյանին: Նաև ՌԲԿ-ն հարցում է ուղարկել Սերգեյ Համբարձումյանին և «Մոնարխ» ընկերությունների խմբին:

Նախօրեին Վերաքննիչ քրեական դատարանն ավարտեց ՀՀ երկրորդ նախագահ, Մարտի 1-ի գործով ամբաստանյալ Ռոբերտ Քոչարյանի պաշտպանների՝ Քոչարյանի խափանման միջոց կալանքը փոխելու միջնորդությունները մերժելու մասին Երևանի ընդհանուր իրավասության դատարանի որոշման դեմ բողոքի քննությունը։ Վերաքննիչ դատարանը բավարարեց Հայաստանի երկրորդ նախագահ Ռոբերտ Քոչարյանի փաստաբանների բողոքը: Նա կալանքից ազատ կարձակվի 2 միլիարդ դրամի գրավը վճարելու դեպքում։

Ավելի վաղ Քոչարյանի գրասենյակից տեղեկատվություն էր ստացվել այն մասին, որ բազմաթիվ մարդիկ պատրաստակամություն են հայտնել աջակցել գրավի գումարը հավաքելու համար, սակայն նրանց ինքնությունը դեռ չէր հրապարակվում։

Այսօր հայտնի է դարձել, որ Ռոբերտ Քոչարյանն ազատ է արձակվել և արդեն տանն է: -0-